Хорижга кўчиб кетаётган ўзбекистонликлар сони камаймоқда

2026 йил январ–март ойларида Ўзбекистондан 2 277 нафар фуқаро доимий яшаш мақсадида хорижий давлатларга кўчиб кетган. Бу ҳақда Миллий статистика қўмитаси маълум қилди.

Маълумотларга кўра, кўчиб кетаётганлар кўрсаткичи ўтган йилнинг мос даврига нисбатан 4,1 фоизга пасайган. Доимий яшаш учун мамлакатни тарк этганларнинг катта қисми қўшни давлатларга тўғри келган. Айниқса, кўчиб кетганларнинг асосий қисми Қозоғистон ва Россия ҳиссасига тўғри келган.

Қайси давлатлар танланмоқда?

Статистикага кўра, доимий яшаш учун кўчиб кетганларнинг 80,6 фоизи Қозоғистонни танлаган.

Шунингдек, Россия улуши 16,4 фоизни ташкил этган.

Жанубий Корея ҳиссасига 0,8 фоиз, Қирғизистонга 0,7 фоиз тўғри келган. Қолган 1,5 фоиз бошқа давлатларга кўчиб кетганлардан иборат.

Ҳудудлар бўйича фарқ

Ҳудудлар кесимида энг юқори кўрсаткич Қорақалпоғистон Республикасида қайд этилган бўлиб, 727 нафар киши доимий яшаш учун мамлакатни тарк этган.

Ундан кейин Тошкент вилоятида 637 нафар ва Навоий вилоятида 511 нафар фуқаро хорижга кўчиб кетган. Шунингдек, Тошкент шаҳридан 243 нафар қайд этилган.

Энг паст кўрсаткичлар эса Сурхондарё вилоятида 3 нафар, Қашқадарё вилоятида 5 нафар ва Фарғона вилоятида 13 нафарни ташкил этган.