Apple buklanadigan iPhone va iPhone 18 Pro’ni qachon taqdim etishi ma’lum bo‘ldi

Apple kompaniyasi 2026-yil 9-sentabr kuni bo‘lib o‘tadigan taqdimotda buklanadigan iPhone, shuningdek, iPhone 18 Pro va Pro Max modellarini namoyish etishni rejalashtirmoqda. Bu haqda «Bloomberg» sharhlovchisi Mark Gurman ma’lum qildi.

Uning ma’lumotlariga ko‘ra, bu kompaniyaning yangi bosh direktori Jon Ternus rahbarligidagi birinchi taqdimoti bo‘ladi. Tadbirda, shuningdek, Apple Watch Series 12 va Ultra 4, AirPods 5, yangi Apple TV hamda HomePod mini qurilmalarining taqdimoti kutilmoqda.

iPhone 18 Pro va Pro Max modellari A20 Pro protsessori, kompaniyaning o‘z C2 modemi va takomillashtirilgan kameralarga ega bo‘ladi. Apple Watch Series 12 va Ultra 4 yangi salomatlik hamda sport faolligini kuzatish funksiyalari bilan jihozlanadi. Series 12 uchun keramik korpus va yangi rang variantlari ham taqdim etiladi.

Gurmanning ta’kidlashicha, 2026-yil oxiri — 2027-yil boshida Apple OLED displeyli iPad mini, iMac va M6 chipiga ega 14 dyuymli MacBook Pro’ni chiqaradi. Bu davrdagi asosiy yangilik birinchi sensorli MacBook bo‘lishi kerak. Kompaniya, shuningdek, 7 dyuymli ekran va sun’iy intellekt funksiyalariga ega Siri bilan jihozlangan aqlli uy xabini ham taqdim etishni rejalashtirmoqda.

Manba ma’lumotlariga ko‘ra, 2027-yilda Apple ichiga kameralar o‘rnatilgan AirPods, displeysiz birinchi aqlli ko‘zoynaklarini, iPhone’ning 20 yilligi munosabati bilan yubiley yangilanishini, buklanadigan iPhone’ning ikkinchi avlodini, shuningdek, MacBook, iPad va Apple Watch’ning yangilangan versiyalarini chiqarishni rejalashtirgan.

Yana uzoqroq istiqbolda Apple ekranga ega stol ustida ishlaydigan uy roboti, sun’iy intellektga ega kulon, buklanadigan iPad va boshqa qator qurilmalarni chiqarish imkoniyatini ko‘rib chiqmoqda.