Asad tarafdorlari saylovlarda qatnasholmaydi

Suriya sobiq hukumati tarafdorlari bo‘lajak parlament saylovlarida nomzodlarini qo‘ya olmaydilar va ovoz berolmaydilar. Bu haqda RIA Novosti Suriya Oliy saylov komissiyasi a’zosi Hasan ad-Dagimga tayanib, ma’lum qildi. «Kimki sobiq tuzumni qurol, pul yoki fikr bilan qo‘llab-quvvatlashi isbotlangan bo‘lsa, unga saylovda ishtirok etish, saylanish va ovoz berish taqiqlanadi. Bu Xalq kengashi a’zosi bo‘lganlar yoki sobiq tuzumni qo‘llab-quvvatlagan partiyalar rahbariyatida bo‘lganlarga ham taalluqli», - deb ta’kidlagan ad-Dagim. Ilgari Suriya Oliy saylov komissiyasi sobiq prezident Bashar Asad hukmronligi tugaganidan so‘ng mamlakatning Xalq kengashiga birinchi saylovlar 5 oktyabr kuni o‘tkazilishini e’lon qilgan edi. Shuningdek, Suriya parlamentiga bo‘lajak saylovlar bilvosita o‘tkazilishini - saylov hay’atlari ovoz berishini ma’lum qildi. Uning so‘zlariga ko‘ra, ularni shakllantirishda 2011 yildagi so‘nggi aholi ro‘yxatiga olish ma’lumotlariga muvofiq, Suriya jamiyatining xilma-xilligi inobatga olingan. Ad-Dagimning ta’kidlashicha, amalda 7-8 ming kishi parlamentning 140 nafar deputatini saylaydi.