Каннаваро терма жамоада «каламуш» борлигини даъво қилди

Ўзбекистон футбол ассоциациясида бўлиб ўтган матбуот анжуманида миллий терма жамоа бош мураббийи Фабио Каннаваро сўнгги пайтларда ўзи ҳақида тарқалган хабарларга муносабат билдирди.

«Кимдир жуда кўп ёлғон маълумот тарқатган. Балки бу менинг хорижлик мураббий эканим билан боғлиқдир. Биз амал қилаётган қоидалар Европа стандартига асосланган. Терма жамоа ичида қандайдир «каламуш» борлиги сабабли ҳам шундай нотўғри маълумотлар кўпайиб кетди», — деди Каннаваро.

Унинг сўзларига кўра, ўзидан аввал ишлаган маҳаллий мураббий яхши натижаларга эришган бўлса-да, бу уни асоссиз танқид қилиш учун сабаб бўла олмайди.

Миш-мишларга жавоб

Матбуот анжуманида Каннаваро жаҳон чемпионатидан кейин Италияга дам олиш учун кетгани ҳақидаги хабарларни ҳам инкор қилди.

Унинг таъкидлашича, жаҳон чемпионати якунланганидан кейин охиригача Ню-Йоркда миллий терма жамоа билан бирга бўлган. Суперлигадаги танаффусдан фойдаланиб, уйига борган ва чемпионат қайта бошланганидан сўнг Ўзбекистонга қайтиб, ўйинларни кузатишни давом эттирган.

Каннаваро, шунингдек, терма жамоани аввалдан жаҳон чемпионатида юқори суръатдаги ўйинлар кутаётгани ҳақида огоҳлантирганини эслатди.

«Кўпчилик мундиалда қийинчиликка дуч келмаймиз деб ўйлагандир, лекин мен бу ҳақда олдиндан огоҳлантиргандим», – деди у.

Маош ҳақида

Италиялик мутахассис ўзининг йиллик маоши 4 миллион евро экани ҳақидаги хабарларни ҳам рад этди.

«Менинг йиллик маошим 4 миллион евро эмас. Афсуски, негадир бундай ахборот қайта-қайта такрорланяпти, лекин бу нотўғри ахборот», — деди Каннаваро.

Шунингдек, Ўзбекистон футбол ассоциацияси мураббийнинг ёрдамчиларига алоҳида маош тўланиши ҳақидаги гапларга ҳам ойдинлик киритди. Маълум қилинишича, Каннаваро билан ишлаётган ёрдамчи мураббийларга ассоциация томонидан алоҳида иш ҳақи тўланмайди.