Nodir metallar poygasi: AQSH Qozog‘istonni Xitoyga muqobil deb e’lon qildi

Amerika Qo‘shma Shtatlari nodir metallar yetkazib berish masalasida Qozog‘istonni Xitoyga munosib muqobil deb hisoblamoqda. Bu haqda AQSHning Qozog‘istondagi elchisi Juli Stafft ma’lum qildi.

Qozog‘iston — nodir metallarning «yashirin xazinasi»

«Siz eng oddiy savolni berdingiz va unga javobim qisqa: ha. Qozog‘istonni Xitoy nazoratidagi nodir minerallar o‘rnini bosa oladigan muqobil manba sifatida ko‘ryapmizmi? Albatta. Qozog‘iston haqidagi ilk ma’lumotlarni o‘rganayotganimda, meni ushbu mamlakatning qazilma boyliklarga qanchalik boy ekani hayratda qoldirdi. Gap shunchaki bir nechta turdagi resurslar haqida emas, u yerda nodir metallarning juda ulkan zaxiralari mavjud», — dedi u elchixona tomonidan e’lon qilingan matbuot anjumanida.

Xitoy omili va diplomatik muvozanat

Juli Stafft Xitoyni Qozog‘iston bozoridan «siqib chiqarish» haqidagi fikrlarga aniqlik kiritar ekan, mamlakatning Xitoyga bo‘lgan bog‘liqligini kamaytirish haqida gapirganiga shubha bildirdi.

«Mening maqsadim — AQSH va Qozog‘iston o‘rtasidagi hamkorlikni kengaytirishdir. Biz Xitoy qo‘shni davlat ekanini va u Qozog‘iston bilan ulkan savdo aloqalariga egaligini tushunamiz. Qozog‘istonning asosiy savdo hamkorlari kimligini bilish uchun Google’dan qisqa qidiruv berishning o‘zi kifoya — AQSH bu ro‘yxatda hali yuqori o‘rinlarda emas. Umid qilamanki, qachonlardir bunga erishamiz, ammo hozircha vaziyat shunday», — dedi diplomat.