Ўзбекистон музейларида билет нархлари сезиларли ошди
2025 йилда Ўзбекистонда музейларга кириш нархи 32,6 фоизга ошган.
2025 йил давомида Ўзбекистонда музейларга кириш билетлари нархи ўртача 32,6 фоизга ошди. Бу ҳақда Миллий статистика қўмитаси хабар берди.
Нархлар ўсиши фақат музейлар билан чекланиб қолмаган. Ҳисоботга кўра, театр хизматлари 17,4 фоизга, кинотеатр хизматлари эса 8,1 фоизга қимматлашган. Бу ҳолат аҳолининг маданий дам олиш харажатлари йил давомида сезиларли даражада ошганини англатади.
Айни пайтда республика ҳудудида 127 та давлат музейи фаолият юритмоқда. Ушбу музейлар фондида 2,6 миллиондан ортиқ экспонат ва қимматбаҳо коллекциялар сақланади. Мазкур объектлар мамлакатнинг маданий меросини сақлаш ва оммалаштиришда муҳим ўрин тутади.
Маълумот учун, 2025 йилда Ўзбекистон музейларига йил давомида 1 миллиондан ортиқ хорижий сайёҳ ва 3,2 миллион нафар маҳаллий аҳоли ташриф буюрган.
