Ўзбекистон яримўтказгичлар саноатини ривожлантириш бўйича 10 йиллик стратегияга эга бўлади
«Intel» собиқ эксперти ва ўзбекистонлик олимлар иштирокида микроэлектроника стратегияси тайёрланмоқда.
© Maksim Shmeljov / Shutterstock.comЎзбекистонда 2027–2036 йилларга мўлжалланган микроэлектроника ва яримўтказгичлар саноатини ривожлантириш бўйича миллий стратегия тайёрланмоқда. Осиё тараққиёт банки (ОТБ) ушбу мақсадлар учун 1,2 миллион АҚШ доллари миқдорида техник ёрдам ажратишни маъқуллади. Бу ҳақда Иқтисодиёт ва молия вазирлиги хабар берди.
Маблағларнинг тақсимланиши ва халқаро тендер
Ажратилган маблағнинг 1 миллион доллари бевосита стратегияни ишлаб чиқишга, қолган 200 минг доллари эса консультантларни жалб қилиш ва кадрлар салоҳиятини ошириш дастурини ишга туширишга йўналтирилади.
Ҳужжатни тайёрлайдиган халқаро консалтинг компаниясини танлаш бўйича тендер 2026 йил 15 октябрда якунланган. Танловда АҚШ, Сингапур, Малайзия ва Ўзбекистондан 5 та компания иштирок этган.
Ишлаб чиқиш гуруҳи:
Стратегияни тайёрлашга яримўтказгичлар соҳасида 25 йилдан ортиқ тажрибага эга халқаро ва маҳаллий мутахассислар жалб қилинган.
Алоҳида таклиф этилган америкалик эксперт Гленн Куиро (Glenn Quiro) 17 йил давомида «Intel» корпорациясида фаолият юритган. Маҳаллий мутахассис сифатида 15 йиллик тажрибага эга физика-математика фанлари доктори (PhD) Ойбек Абдулхаев иштирок этмоқда.
Кадрлар тайёрлаш ва чет элда малака ошириш
Кадрлар салоҳиятини ошириш дастури доирасида 300 та номзод орасидан 50 киши саралаб олиниб, улар учун интеграл схемаларни лойиҳалаш (IC Design) бўйича ўқув курслари ташкил этилди:
— Малайзия ва Жанубий Корея: 20 нафар номзод Малайзиядаги стипендиаль курсларга юборилади. Яна 20 нафар мутахассис ва ўқитувчи Жанубий Кореянинг Сунсиль ва Хосео университетларига икки ойлик малака оширишга юборилади.
— «ToshTech» ва NIELIT лойиҳаси: Ҳиндистоннинг NIELIT институти билан ҳамкорликда «ToshTech» техник университети базасида 100 киши учун VLSI ва яримўтказгич технологиялари бўйича бепул ўқув дастури йўлга қўйилмоқда.
— Давлат хизматчилари таълими: 2025–2026 йиллар давомида ўтказилган тренинг ва семинарларда 30 дан ортиқ вазирлик ва идораларнинг 130 га яқин раҳбар ходимлари яримўтказгичлар соҳаси бўйича ўз билимларини оширди.
