Rossiyaliklar o‘zlarining vertolyotini urib tushirdi

Rossiya havo mudofaasi kuchlari Ukraina dronlarining Rossiya hududiga hujumini qaytarish paytida xatolik tufayli o‘zining Ka-52 jangovar vertolyotini urib tushirdi. Bu haqda Fighterbomber, Aviahub va «Voyevoda veshayet» Telegram-kanallari ma’lum qildi.

The Insider ma’lumotlariga ko‘ra, bu urush boshlanganidan beri Rossiya armiyasi vertolyotini yo‘qotgan kamida beshinchi holat hisoblanadi. «Pozivnoy Katsman» nomli Telegram-kanali aniqlik kiritishicha, hodisa vertolyotni Ukraina droni deb o‘ylagan qiruvchi samolyot uchuvchisining xatosi tufayli yuz bergan.

«Ka-52 (52M) urib tushirildi, afsuski, shaxsiy tarkibda yo‘qotishlar ham bor. O‘zimiznikini urib tushirganga o‘xshaydi — qiruvchi samolyot ishladi. Ma’lum bo‘lishicha, uni dron bilan adashtirishgan, chamasi, dron yaqin atrofda bo‘lgan, shunchaki noto‘g‘ri nishonga urishgan. Hodisa va uning sabablari tekshirilmoqda», - deyiladi xabarda.

Rossiya armiyasida bunday holatlar ilgari ham sodir bo‘lgan. 2024 yil iyun oyida Anapa ustida Rossiya havo mudofaasi tizimi Rossiya Aerokosmik kuchlarining Ka-29 vertolyotini urib tushirgan. O‘shanda hodisa oqibatida butun ekipaj — to‘rt kishi halok bo‘lgan edi.

The Insider nashrining hisob-kitoblariga ko‘ra, urush davomida Rossiya «o‘zinikilarga qarata o‘t ochish» oqibatida kamida 17 ta uchish apparatini, jumladan, 12 ta samolyot va 5 ta vertolyotni yo‘qotgan. Ular orasida to‘rtta Su-35, uchta Su-34, ikkita A-50, bittadan Su-27, Su-30 va Il-22 hamda ikkita Ka-52, Ka-29, Mi-24 va Mi-8 bor.