SpaceX birinchi marta «Starship» kemasini orbitaga uchirdi
Bu — tarixdagi eng og‘ir raketa.
SpaceX kompaniyasi «Starship» kosmik kemasini orbitaga muvaffaqiyatli uchirdi.
Kema taxminan 275 kilometr balandlikka ko‘tarildi. U orbitada 26 ta Starlink V3 sun’iy yo‘ldoshini joylashtirdi.
Umuman olganda, «Starship» deyarli o‘n soat davomida Yer atrofini taxminan olti marta aylanib chiqishi, shundan so‘ng Tinch okeaniga qo‘nishi kerak.
Yangi parvoz «Starship» uchun orbitaga birinchi to‘laqonli chiqish bo‘ldi. Bungacha raketa 13-marta suborbital trayektoriyalarga uchirilgan bo‘lib, ulardan sakkizta parvoz muvaffaqiyatli yakunlangan.
Ma’lumot uchun, «Starship» tizimi ikki asosiy qismdan — Super Heavy raketa-bloki va Starship kosmik kemasidan iborat. «Starship»ning balandligi taxminan 123 metr, to‘liq yig‘ilgan holdagi og‘irligi esa 5 ming tonnadan ortiq bo‘lishi mumkin.
SpaceX «Starship»ni kelajakda insonlarni Oy va Marsga olib borish, shuningdek, katta hajmdagi yuklarni orbitaga chiqarish uchun ishlatishni rejalashtirgan.
Starlink V3 — SpaceX’ning avvalgi Starlink avlodlariga nisbatan yuqoriroq o‘tkazuvchanlikka mo‘ljallangan sun’iy yo‘ldoshlar avlodi. Ular katta hajmdagi ma’lumotlarni uzatish imkoniyatini oshirish uchun ishlab chiqilgan. Ushbu parvoz «Starship» dasturida muhim bosqich hisoblanadi, chunki avvalgi sinovlar asosan suborbital trayektoriyalar bo‘yicha amalga oshirilgan.
«Starship» orbitaga chiqishi bilan SpaceX’ning yirik yuklarni Yer orbitasiga olib chiqish va keyinchalik qayta foydalaniladigan kosmik transport tizimi yaratish rejalaridagi muhim bosqich amalga oshirildi.