Tramp O‘zbekistonga kelmoqchi
Prezidentning do‘sti O‘zbekiston Trampning ro‘yxatida ekanini ma’lum qildi. Bu xabar AQSHning katta savdo delegatsiyasi oktabr o‘rtalarida Samarqandga kelishi kutilayotgan bir paytda aytildi.
© whitehouse.govDonald Tramp O‘zbekistonga tashrif buyurishni rejalashtirmoqda. Ammo hozircha bu tashrifning aniq sanasi belgilanmagan. Bu haqda AQSHning yuqori lavozimli savdo vakili va Trampning do‘sti Paolo Zampolli ma’lum qildi.
Bu xabar AQSHning katta savdo delegatsiyasi oktabr o‘rtalarida O‘zbekistonga kelishi kutilayotgan bir paytda yangradi.
AQSHning Global hamkorlik bo‘yicha maxsus vakili Paolo Zampolli yaqinda Toshkentga tashrifi vaqtida O‘zbekiston televideniyesiga bergan intervyusida O‘zbekiston Trampning «amalga oshirmoqchi bo‘lgan ishlar ro‘yxati»da borligini aytdi.
«Men uning O‘zbekistonga kelishni xohlayotganini bilaman. Prezidentning jadvali juda band. Ammo u menga O‘zbekistonga tashrif buyurishni xohlashini aytdi. Men ham bu masalani doim ko‘tarib kelaman. Umid qilamizki, bu tashrif imkon qadar tezroq amalga oshadi», — deydi Zampolli.
Uning aytishicha, Tramp va O‘zbekiston prezidenti Shavkat Mirziyoyev o‘rtasida yaqin munosabat shakllangan. U ikki prezidentning aloqalarini «o‘ziga xos» deb ta’riflagan.
«Ular o‘rtasida do‘stona va ishonchli munosabat shakllangan. Ular telefon orqali muntazam gaplashib turadi», — dedi Zampolli.
Mirziyoyev Trampni O‘zbekistonga bir necha bor taklif qilgan. Tramp ma’muriyati esa so‘nggi 18 oy davomida Markaziy Osiyo davlatlari bilan aloqalarni kuchaytirmoqda. Buning asosiy sabablaridan biri —mintaqadagi katta miqdordagi muhim foydali qazilmalar va strategik minerallarga kirish imkoniyatini kengaytirish.
Qozog‘iston ham Trampning mamlakatga tashrif buyurishi uchun faol harakat qilmoqda. AQSH hukumati Markaziy Osiyo, ayniqsa O‘zbekiston bilan aloqalarni yanada kuchaytirishga jiddiy e’tibor qaratayotganga o‘xshaydi.
AQSH Davlat kotibi Marko Rubio oktabr o‘rtalarida Samarqand shahrida bo‘lib o‘tadigan Markaziy Osiyo davlatlari tashqi ishlar vazirlari yig‘ilishida ishtirok etishni rejalashtirmoqda. Ushbu uchrashuv «C5+1» formatida o‘tkaziladi. Rubio bilan birga AQSHdan 100 kishilik yirik savdo delegatsiyasi ham keladi.
Uchrashuvning asosiy maqsadi — «C5+1» doirasida mintaqadagi umumiy muammolar bo‘yicha hamkorlikni kuchaytirish va AQSHning Markaziy Osiyodagi savdo imkoniyatlarini kengaytirish.
AQSH savdo delegatsiyasi esa turli sohalarda yangi kelishuv va shartnomalar tuzish uchun zamin yaratishga harakat qiladi.
Zampolli yaqinda O‘zbekistonga qilgan tashrifi davomida AQSH O‘zbekiston hukumatining mamlakatni mintaqadagi yirik aviatsiya markaziga aylantirish bo‘yicha rejalarini qo‘llab-quvvatlashini ham ta’kidladi. Toshkent aeroporti 2026-yilning dastlabki olti oyida 5,4 million yo‘lovchiga xizmat ko‘rsatgan. Bu o‘tgan yilning shu davriga qaraganda 17 foiz ko‘p.
Samarqand, Buxoro va Termiz aeroportlarida ham yo‘lovchilar soni sezilarli darajada oshgan. Yaqinda e’lon qilingan Boeing prognoziga ko‘ra, kelgusi 20 yil ichida Markaziy Osiyo aviatsiya sohasi eng tez rivojlanadigan bozorlardan biriga aylanishi mumkin. Yangi samolyotlarning katta qismi mintaqa ichidagi qisqa va o‘rta masofali parvozlar uchun kerak bo‘ladi. Shu bilan birga, Markaziy Osiyo davlatlari uzoq masofaga uchadigan samolyotlar va xalqaro yo‘nalishlarni ham rivojlantirishga qiziqmoqda.
2025-yilda O‘zbekiston uzoq masofaga parvoz qiladigan 22 ta Boeing 777 Dreamliner samolyotini sotib olishga kelishgan. Qozog‘istonning «Air Astana» aviakompaniyasi ham Dreamliner samolyotlarini sotib olgan. Boeing prognozida shunday deyiladi:
«Markaziy Osiyo davlatlari o‘z aviatsiya markazlari va milliy aviakompaniyalarini rivojlantirishga sarmoya kiritar ekan, mintaqaning ahamiyati yanada ortadi. O‘sib borayotgan yo‘lovchi talabini qondirish uchun Yevroosiyo aviakompaniyalari foydalanayotgan samolyotlar sonini hozirgi 6 800 dan sal ko‘proq miqdordan 2045-yilga borib 10 ming 820 tagacha oshirishi kerak bo‘ladi».
Zampolli, shuningdek, AQSHning qishloq xo‘jaligi va oziq-ovqat mahsulotlari sohasida faoliyat yurituvchi yirik kompaniyasi «Cargill»ning O‘zbekistondagi investitsiyalari hajmi 6 milliard dollargacha yetishi mumkinligini aytdi.
Avvalroq kompaniyaning O‘zbekistonga kiritishi mumkin bo‘lgan investitsiyalari 3–5 milliard dollar atrofida bo‘lishi mumkinligi aytilgan edi.
Eslatib o‘tamiz, Prezident administratsiyasi rahbari Saida Mirziyoyeva yaqinda Vashingtonda AQSH prezidenti Donald Tramp bilan uchrashgandi.
