Трампнинг баёноти нефт нархларини пасайтирди
Биржаларда «Brent» ва WTI нархлари қарийб 10 фоизгача тушди.
АҚШ президенти Доналд Трампнинг Эрондаги энергетика инфратузилмаларига қарши зарбаларни вақтинча тўхтатиш қарори глобал нефт бозорида кескин пасайишга олиб келди. ICE биржасида июн ойидаги «Брент» маркали нефт фючерси 9,1 фоизга арзонлашиб, бир баррел учун 101,8 долларни ташкил этди.
Шу билан бирга, май ойи учун WTI нефти фючерслари ҳам 9,93 фоизга арзонлаб, 88,4 долларгача пасайди. Бу сўнгги кунлардаги энг катта пасайишлардан бири сифатида қайд этилди.
Бундай ўзгаришларга Трампнинг Эрон энергетика инфратузилмасига зарбаларни беш кунга кечиктириш ҳақидаги баёноти сабаб бўлди. Унинг сўзларига кўра, сўнгги икки кун давомида Эрон билан самарали музокаралар олиб борилган.
Президент «Truth Social» орқали чиқиш қилиб, ҳарбий ҳаракатларни вақтинча тўхтатиш бўйича кўрсатма берилганини маълум қилди.
«Мен Уруш вазирлигига Эрон электр станциялари ва энергетика инфратузилмасига қарши ҳар қандай зарбаларни беш кун муддатга тўхтатиб туришга буйруқ бердим», — деб ёзди у.
Бу қарор бозор иштирокчилари томонидан кескинликнинг пасайиши сифатида қабул қилинди.
