«Centrum Air»нинг яна бир самолётини чақмоқ урди
«Centrum Air» авиакомпаниясининг Тошкент — Урганч йўналишидаги C6089 рейси самолётига чақмоқ урилгани сабаб бошқа ҳаво кемасига алмаштирилди.
© Vaqt.uz | Javhar Chorshanbiyeva2026 йил 19 май куни амалга оширилиши режалаштирилган C6089 рейси учун дастлаб «Airbus A330» самолёти ажратилган эди. Бироқ парвоздан олдин ҳаво кемасига чақмоқ урилгани аниқланиб, самолёт техник кўрик ва хизмат кўрсатиш ишларига юборилди.
Шундан сўнг авиакомпания рейсни бекор қилмаслик мақсадида кичикроқ сиғимга эга «Airbus A320» самолётидан фойдаланишга қарор қилди. Натижада 40 нафар йўловчи мазкур рейс билан парвоз қила олмади.
Авиакомпания маълумотига кўра, йўловчиларга дарҳол икки хил вариант таклиф этилган. Улар чипта маблағини тўлиқ қайтариб олиш ёки энг яқин бўш рейсга, жумладан бошқа авиакомпаниялар рейсларига қайта банд қилиш имкониятига эга бўлган.
Ажратилган компенсация
Кутиш вақти узоқ давом этган йўловчилар меҳмонхонага жойлаштирилган ва харажатлар авиакомпания томонидан қопланган. Шунингдек, ноқулайликлар учун қўшимча компенсациялар ҳам эълон қилинди.
Хусусан, йўловчиларга «Centrum Air»нинг ички йўналишларидаги кейинги парвоз учун 50 фоизли чегирма промокоди, битта бепул багаж жойи ҳамда юқори қулайликка эга ўриндиқ тақдим этилади.
Авиакомпания юзага келган ҳолат учун йўловчилардан узр сўраб, хавфсизлик талаблари устувор эканини таъкидлади.
16-май куни «Centrum Air»нинг Тошкент—Гуанчжоу—Тошкент йўналишида қатновчи самолётини чақмоқ урганди. Ҳаво кемаси зудлик билан парвозлардан четлаштирилганди. Йўловчилар эса меҳмонхонага жойлаштирилганди.
