Iroq va kurd rasmiylari eksport bo‘yicha kelishuvga erishgach, neft narxlari pasaydi

Bugun, 18-mart kuni neft narxlari pasaydi va kechagi keskin o‘sishning bir qismini yo‘qotdi. Bunga Iroq hukumati va kurd rasmiylari Turkiyaning Jeyhan porti orqali neft eksportini qayta tiklash bo‘yicha kelishuvga erishgani sabab bo‘ldi. Bu Yaqin Sharqdagi ta’minot bo‘yicha xavotirlarni biroz yumshatdi, deb xabar berdi «Reuters».

Biroq, Eron bilan bog‘liq mojaroda pasayish alomatlari kuzatilmayapti va bu Yaqin Sharqdan neft eksportining katta qismi to‘xtab qolishiga olib kelgan. Shu sababli «Brent» fyucherslari so‘nggi to‘rt savdo sessiyasi davomida barreli 100 dollardan yuqori darajada saqlanib turdi.

Kecha, 17-mart kuni 3 foizdan ortiq o‘sgandan keyin, bugun, 18-mart kuni 02:09 holatiga ko‘ra «Brent» narxi 67 sentga (0,65 foiz) pasayib, barreli 102.75 dollarni tashkil etdi. AQSHning «West Texas Intermediate» nefti esa 1.18 dollar (1,23 foiz)ga tushib, 95.03 dollarga yetdi.

Iroq neft vaziri Hayan Abdulg‘ani davlat OAV orqali ma’lum qilishicha, Jeyhan orqali neft oqimi bugun, 18-mart kuni boshlanishi kutilmoqda. Ikki amaldor o‘tgan hafta Iroq port orqali kuniga kamida 100 ming barrel neft chiqarishni rejalashtirayotganini bildirgan.

«Bu, albatta, ma’lum darajada yordam beradi va vaqt yuttiradi, ammo kuniga 100 ming barrel katta o‘zgarish yaratmaydi, chunki Iroq hali ham taxminan kuniga ikki million barrel neft yo‘qotgan», – dedi «IG» bozor tahlilchisi Toni Sisamor.

Iroqning asosiy janubiy neft konlarida, mamlakat neftining katta qismi ishlab chiqariladigan va eksport qilinadigan hududlarda, ishlab chiqarish keskin pasayib, kuniga atigi 1,3 million barrelga tushib qoldi. Manbalarning 8-martda bildirishicha, bunga Eron bilan bog‘liq mojaro sabab bo‘lib, dunyo neftining taxminan 20 foizi o‘tadigan Ho‘rmuz bo‘g‘ozi de-fakto yopilib qolgan.

Urush davom etmoqda

Eron 17-mart kuni uning xavfsizlik bo‘yicha yuqori martabali rasmiysi Ali Larijoni Isroil hujumida halok bo‘lganini tasdiqladi. U AQSH–Isroil urushi boshlanganidan beri nishonga olingan eng yuqori lavozimli shaxs hisoblanadi.

Yuqori lavozimli eronlik amaldorning aytishicha, Eronning yangi oliy rahbari vositachi davlatlar orqali yetkazilgan deeskalatsiya takliflarini rad etgan.

AQSH harbiylari 17-mart kuni Ho‘rmuz bo‘g‘ozi yaqinidagi Eron sohil hududlarida joylashgan obyektlarga zarba berganini ma’lum qildi, chunki Eronning kemalarga qarshi raketalari xalqaro dengiz tashuvlariga xavf tug‘dirayotgani aytildi.

«Ali Larijonining o‘limi va AQSHning Ho‘rmuz bo‘g‘ozi yaqinidagi Eron pozitsiyalariga bergan zarbalari mojaro tezroq tugashi mumkinligiga ayrim umidlarni kuchaytirdi», – dedi «China Futures» kompaniyasining energetika va kimyo sohasi bo‘yicha bosh tadqiqotchisi Mingyu Gao.

AQSHda neft zaxiralari 13-martda tugagan haftada 6,56 million barrelga oshgan, deya bozor manbalari «American Petroleum Institute» (API) ma’lumotlariga tayanib xabar qildi. AQSH neft zaxiralari 13-martgacha bo‘lgan haftada taxminan 380 ming barrelga oshgan bo‘lishi kutilgan.