Жаҳон банки Ўзбекистонгa йўл учун 200 млн доллар ажратди

2026 йил 23 март куни Жаҳон банки Ўзбекистоннинг Сурхондарё вилоятида М41 минтақавий йўлининг бир қисмини реконструкция қилиш учун 200 миллион доллар ажратишни маъқуллади. Лойиҳа йўл инфратузилмасини янгилаш ва транспорт соҳасидаги ислоҳотларни қўллаб-қувватлашни қамраб олади.

Ўзбекистон транспорт сектори ЯИМнинг қарийб 8 фоизини шакллантиради ва бир миллионга яқин аҳолини иш билан таъминлайди. Сўнгги ўн йилда мамлакат Жаҳон банкининг Логистика самарадорлиги индексида 129-ўриндан 88-ўринга кўтарилди.

Шу билан бирга, автомобиллар сонининг тез ўсиши йўл инфратузилмасидан устун келмоқда. Прогнозларга кўра, 2030 йилгача юк ташиш ҳажмини қоплаш учун йўл сиғими қарийб 500 фоизга кенгайтирилиши талаб этилади.

«Самарали ва хавфсиз йўл ҳамда темир йўл тармоқларини ривожлантириш Ўзбекистоннинг рақобатбардошлигини ошириш учун муҳим. Жаҳон банки Ўзбекистонда транспорт инфратузилмаси ва хизматларини яхшилаш, шунингдек, транспорт соҳасида ислоҳотларни амалга оширишни қўллаб-қувватлайди», — Жаҳон банкининг Марказий Осиё бўйича директори Нажи Бенҳассин.

5 йил ичида нима қилинади?

Беш йиллик лойиҳа доирасида Сурхондарё вилоятидаги М41 минтақавий йўл коридорининг 91 километрли қисми реконструкция қилинади. Ушбу йўл Ўзбекистонни Тожикистон, Қирғизистон ва Афғонистон билан боғлайди ва мавжуд икки қаторли йўл тўрт қаторли автомагистралга кенгайтирилади.

Лойиҳа якунлангач, мазкур йўлдан ҳар куни тахминан 35 минг нафар ҳайдовчи ва йўловчи фойдаланиши кутилмоқда. Шу билан бирга, атроф ҳудудларда яшовчи 550 мингга яқин аҳоли учун транспорт хизматларидан фойдаланиш имкониятлари ва иқтисодий фаоллик кенгаяди, янги иш ўринлари ва бизнеслар пайдо бўлади.

Лойиҳа доирасида йўл қопламаси сифатини яхшилаш, йўл хавфсизлиги инфратузилмасини ривожлантириш ва автобус бекатларидан фойдаланиш имкониятларини ошириш ишлари амалга оширилади. Шунингдек, сув тошқини хавфига мослашган қарийб 180 та кўприк ва дренаж иншоотлари қурилади ёки реконструкция қилинади.

Бу чоралар йўл-транспорт ҳодисалари ва ўлим ҳолатларини камайтириш, саёҳат вақтини қисқартириш (ўртача тезлик 65 дан тахминан 90 км/соатгача ошиши кутилмоқда), йўловчи ва юк ташиш ишончлилигини ошириш ҳамда Сурхондарё вилоятининг мамлакатнинг бошқа ҳудудлари ва қўшни давлатлар билан алоқасини мустаҳкамлашга хизмат қилади.

Шу билан бирга, Транспорт вазирлиги учун Миллий мультимодал транспорт стратегияси ишлаб чиқилади. У транспорт хизматлари ва инфратузилмасини ривожлантириш учун йўл харитаси вазифасини бажаради, қарор қабул қилишда маълумотларга асосланган ёндашувни кучайтиради ва турли транспорт турлари ўртасидаги боғлиқликни яхшилашни кўзлайди.

Бундан ташқари, «Ўзбекистон темир йўллари» АЖда бизнес жараёнлари, корпоратив бошқарув, молиявий шаффофлик, йўловчи хизматларини режалаштириш ҳамда ESG амалиётларини яхшилашга қаратилган чора-тадбирлар амалга оширилади. Бу компаниянинг самарадорлигини ошириш ва хусусий инвестицияларни жалб қилиш имкониятларини кенгайтиришга хизмат қилади.

Умуман олганда, мазкур ишлар транспорт, савдо ва туризм соҳаларида янги иш ўринларини яратиш, юк ва йўловчи оқимини ошириш ҳамда Ўзбекистоннинг минтақавий транзит маркази сифатидаги ўрнини мустаҳкамлашга қаратилган.