Ким Чен Ин Шимолий Корея давлат ишлари раиси этиб қайта сайланди
У мутлақ кўпчилик — 99,93 фоиз овоз билан Шимолий Корея давлат ишлари раиси этиб қайта сайланди. Мазкур сайловда аҳолининг қатнашиш даражаси 99,99 фоизни ташкил этган.
Шимолий Корея етакчиси Ким Чен Ин давлат ишлари раиси лавозимига қайта тайинланди. У 99,93 фоиз овози билан тасдиқланган, сайловда иштирок этиш даражаси эса 99,99 фоиз бўлган. Бу ҳақда бугун, 23-март куни давлатнинг «KCNA» ахборот агентлиги бир кун аввал чақирилган Олий Халқ Ассамблеясининг биринчи сессияси якунларига таяниб хабар берди.
Пхенянда бўлиб ўтаётган йиғилишда социалистик конституцияга ўзгартириш ва қўшимчалар киритиш, шунингдек, Давлат ишлари комиссияси раиси ва бошқа давлат раҳбарлиги органларини сайлаш масалалари муҳокама қилинади. Давлат сиёсатини расман тасдиқловчи ушбу ассамблея одатда ҳукмрон Ишчилар партияси қурултойидан сўнг партия қарорларини қонунга айлантириш учун йиғилади. Шунингдек, йиғилишда феврал ойида бўлиб ўтган тўққизинчи партия қурултойида эълон қилинган мамлакатнинг беш йиллик иқтисодий режаси ҳам кўриб чиқилади.
Жанубга нисбатан сиёсат
Йиғилиш давомида асосий эътибор Пхенян ўзининг Жанубий Кореяга нисбатан «икки душман давлат» сиёсатини қонунийлаштириш учун конституцияни ўзгартириш-ўзгартирмаслигига қаратилган. Сўнгги йилларда Ким Чен Ин тинч йўл билан бирлашиш бўйича узоқ йиллик мақсадидан воз кечиб, Жанубни душман давлат сифатида белгилади.
Ким Ё Чжоннинг мақоми
Эътиборли жиҳати шундаки, Ким Чен Иннинг синглиси Ким Ё Чжон 2021-йилдан буён фаолият юритиб келаётган мамлакатнинг энг олий раҳбарлик органи — Давлат ишлари комиссияси аъзолари рўйхатидан жой олмади. Жанубий Корея Бирлашиш вазирлиги бунинг сабабларини ўрганаётганини маълум қилди.
Аммо таҳлилчиларнинг фикрича, бу ҳолат таъсир доирасининг йўқотилишини англатмайди. Кённам университети профессори Лим Эл Чулнинг таъкидлашича, унинг рўйхатда йўқлиги мақомнинг пасайишини эмас, балки ролларнинг стратегик тақсимланишини билдиради. Унга кўра, Ким Ё Чжон ҳукмрон Ишчилар партиясининг бўлим бошлиғи сифатида ҳақиқий ҳокимиятни ўз қўлида сақлаб қолмоқда ва партияда юқори даражадаги сиёсатни мувофиқлаштирувчи ролни бажариши мумкин.
Ким Чен Ин ҳақида
У 1984-йилнинг 8-январ куни туғилган (Жанубий Корея ва Ғарб манбаларига кўра, ҳозирда у 42 ёшда). Ким Чен Ин 2011-йилнинг декабр ойида, отаси Ким Чен Ир вафотидан сўнг ҳокимият тепасига келган. Ўша вақтда у тахминан 27 ёшда бўлиб, дунёдаги энг ёш давлат раҳбарларидан бирига айланган эди. Ким Чен Ин ўзининг қарийб 15 йиллик бошқаруви даврида мамлакатнинг ҳарбий, хусусан, ядро ва ракета дастурларини ривожлантиришга асосий эътиборни қаратиб келмоқда.
