Лавров–Рубио қўнғироқлашуви Путин учун жуда қимматга тушди — The Telegraph
Бир телефон суҳбати Вашингтоннинг кескин сиёсий бурилишига олиб келди: АҚШ илк бор Россиянинг бош даромад манбаларига тўғридан тўғри санкция жорий этди.
The Telegraph нашрининг ёзишича, Россия ТИВ раҳбари Сергей Лавров ва АҚШ давлат котиби Марко Рубио ўртасидаги маърузали қўнғироқ ортидан президент Доналд Трамп Кремлга нисбатан янги, қаттиқ чораларни қабул қилди. Илгари Трамп янгидан янги чекловларга шошилмаган бўлса, бу гал Америка «Роснефт» ва «Лукойл»га зарба бериб, Россия нефт экспортнинг ярмига яқин қисмини қамраб олди.
Нефт ҳануз Москва учун урушни молиялатиришнинг асосий манбаи саналади. Халқаро энергия агентлиги маълумотига кўра, сентябрда Россия кунига 5,1 млн баррел нефт экспорт қилиб, тахминан 13,4 млрд доллар тушум олган. Янги чекловлар бу оқимни жиддий қисқартириши мумкин.
Асосий интрига — Ҳиндистон ва Хитойнинг реакцияси. Расман санкциялар фақат америкалик субъектларга тааллуқли, аммо иккиламчи санкциялар хавфи чет эл трейдерлари ва банкларини ҳам Россия билан битимлардан четлаштириши мумкин.
Ҳиндистон харидларни қисқартириш ниятини билдирди. Хитой эса эҳтимол савдони давом эттиради, лекин янада каттароқ чегирма талаб қилади: Urals бренди учун чегирмалар аллақачон ҳар баррел учун 13 доллардан ошиб кетган.
Трамп ҳозирча Украинага Tomahawk типидаги узоқ масофали қанотли ракеталарни бериш ва кескин иккиламчи жазолардан тийилмоқда, бироқ бу қарорнинг ўзиёқ Кремл иқтисодиётига кучли зарба бўлди.
Будапештдаги учрашув ўрнига — янги санкциялар ва босимнинг кучайиши. Шунга қарамай, таҳлилчилар Путин Вашингтон билан қайта алоқа излашга уриниши мумкинлигини истисно этмаяпти — у Трампдан навбатдаги сиёсий бурилишни умид қилиши мумкин.
