Reklama qonunini buzgan blogerlar, rekord darajada to‘plangan oltin va VEON xarid qilgan OLX — 9-noyabr dayjesti

O‘zbekistonning oltin-valuta zaxiralari yil boshidan beri eng past darajaga tushdi

2026 yilning 1-noyabr holatiga ko‘ra, O‘zbekistonning oltin-valuta zaxiralari 63,62 milliard dollarni tashkil etib, yil boshidan beri kuzatilgan eng past ko‘rsatkichga tushdi. Markaziy bank ma’lumotlariga ko‘ra, oktabr oyida umumiy zaxiralar qariyb 3 milliard dollarga qisqargan. Mazkur kamayishga jahon bozorida oltin narxining arzonlashuvi asosiy omil bo‘lib, zaxiradagi oltin qiymati 2 milliard dollardan ko‘proqqa, erkin konvertatsiya qilinadigan valuta qismi esa 921 million dollarga kamaygan.

Umumiy qiymatning pasayishiga qaramay, mamlakat zaxirasidagi oltinning fizik hajmi oy davomida 7,33 tonnaga ko‘payib, 453,5 tonnaga yetdi va bu O‘zbekiston tarixidagi yangi rekord ko‘rsatkich hisoblanadi. Shuningdek, umumiy xalqaro zaxiralar tarkibida oltinning ulushi 91 foizga yetib, mazkur yo‘nalishda ham yangi maksimum qayd etildi.

Beeline Qozog‘istondagi OLX platformasini 81 mln dollarga sotib oldi

«Beeline Kazakhstan»ning bosh kompaniyasi hisoblangan VEON Qozog‘istondagi OLX platformasining 100 foiz ulushini 81 million dollarga sotib oldi. Bitim 2026 yil 6-noyabrda tegishli ruxsatlar olingach to‘liq yakunlangan bo‘lib, xarid qiymatiga qariyb 6 million dollarlik tuzatishlar ham kiritilgan. Oyiga qariyb 9 million kishi (mamlakat internet auditoriyasining 52 foizi) foydalanadigan va yillik tushumi 28 million dollardan oshadigan mazkur e’lonlar platformasi endilikda VEON'ning raqamli xizmatlar ekotizimiga integratsiya qilinadi.

Ma’lumot o‘rnida, Qozog‘istondagi mazkur bitimdan avval O‘zbekistondagi OLX platformasi ham «TBC Bank Group» tomonidan sotib olingan edi. Raqobat qo‘mitasi 2026 yilning iyun oyida TBC guruhiga aloqador «Tapuz Limited» kompaniyasiga OLX’ning 100 foiz ulushini xarid qilishga rozilik bergan. Qo‘mita mazkur xaridga foydalanuvchilarni faqat «TBC Bank» yoki «Payme» orqali to‘lov qilishga majburlamaslik va yig‘ilgan ma’lumotlardan raqobatni cheklash maqsadida foydalanmaslik kabi qat’iy shartlar asosida ruxsat bergan.

Reklama qonunchiligini buzgan 12 bloger jazolandi

Raqobat qo‘mitasi ijtimoiy tarmoqlarda faoliyat yuritayotgan 110 nafar blogerning sahifalarida kunlik monitoring o‘tkazib, «Reklama to‘g‘risida»gi qonun talablarini buzgan 12 nafar blogerga nisbatan ma’muriy jazo choralarini qo‘lladi. Qo‘mita ta’kidlashicha, reklama materiallarida iste’molchilarni chalg‘ituvchi, tovar va xizmatlar haqida noto‘g‘ri tasavvur uyg‘otuvchi yoki yashirin ma’lumotlarni tarqatish mumkin emas.

Shuningdek, qo‘mita tomonidan taniqli qo‘shiqchilar, aktyor-aktrisalar va sportchilarning ham alohida ro‘yxati shakllantirilgan bo‘lib, endilikda ularning ham ijtimoiy tarmoqlardagi reklama faoliyati muntazam nazorat qilib boriladi. Idora qonunchilik talablarini bilmaslik javobgarlikdan ozod etmasligini eslatib, ijtimoiy tarmoqlardagi reklamalar ustidan nazorat yanada kuchaytirilishini ma’lum qildi.

Yana bir tashkilotga kripto-do‘kon faoliyatini amalga oshirish uchun litsenziya berildi

Istiqbolli loyihalar milliy agentligi tomonidan 2026 yilning 9-noyabr kuni «C-STORE» MCHJga kripto-do‘kon faoliyatini amalga oshirish uchun litsenziya taqdim etildi. Mazkur ruxsatnoma berilganidan so‘ng, O‘zbekistonda qonuniy ravishda kripto-do‘kon faoliyatini yuritish huquqiga ega bo‘lgan korxonalar soni 15 taga yetdi. Eslatib o‘tamiz, bundan avval 26-oktabr kuni «Monetex» MCHJga ham xuddi shunday litsenziya berilgan edi.

Shuningdek, bugungi kunda mamlakatda kripto-birja faoliyati bo‘yicha «Kobea Group» va «Coinpay» kompaniyalari ham tegishli litsenziyaga ega bo‘lib faoliyat yuritmoqda. Agentlik fuqarolarga kripto-aktivlar bilan bog‘liq operatsiyalarni faqatgina O‘zbekistonda belgilangan tartibda litsenziya olgan rasmiy platformalar orqali amalga oshirishni hamda ularning ro‘yxati bilan «napp.uz» sayti orqali tanishib borishni tavsiya qiladi.

O‘zbekiston yarimo‘tkazgichlar sanoatini rivojlantirish bo‘yicha 10 yillik strategiyaga ega bo‘ladi

O‘zbekistonda 2027–2036 yillarga mo‘ljallangan mikroelektronika va yarimo‘tkazgichlar sanoatini rivojlantirish bo‘yicha milliy strategiya ishlab chiqilmoqda. Mazkur loyihani amalga oshirish uchun Osiyo taraqqiyot banki tomonidan 1,2 million dollar (shundan 1 mln dollari strategiyaga, 200 ming dollari kadrlar va konsultantlarga) miqdorida texnik yordam ajratilishi ma’qullandi. Hujjatni tayyorlashga xalqaro tender asosida tanlab olingan mutaxassislar, jumladan, 17 yil «Intel» korporatsiyasida faoliyat yuritgan amerikalik ekspert Glenn Kuiro hamda mahalliy olim, fizika-matematika fanlari doktori Oybek Abdulxayev boshchiligidagi tajribali guruh jalb qilingan.

Loyiha doirasida soha uchun malakali kadrlar tayyorlash va ularning salohiyatini oshirishga alohida e’tibor qaratilmoqda. Xususan, integral sxemalarni loyihalash bo‘yicha saralab olingan 50 nafar nomzodning 20 nafari Malayziyaga, yana 20 nafari esa Janubiy Koreya universitetlariga ikki oylik malaka oshirishga yuboriladi. Shuningdek, Hindistonning NIELIT instituti bilan hamkorlikda «ToshTech» bazasida 100 kishi uchun yarimo‘tkazgich texnologiyalari bo‘yicha bepul o‘quv dasturi yo‘lga qo‘yilmoqda, qolaversa, 2025–2026 yillar davomida 30 dan ortiq davlat idoralarining 130 ga yaqin rahbar xodimlari ushbu yo‘nalishda maxsus trening va seminarlarda o‘z bilimlarini oshirdi.