Украина НАТО орқали қурол-яроғ ва ўқ-дорилар харид қилиш имконига эга бўлди

Украина НАТОнинг ўз харидлар агентлиги орқали қурол-яроғ ҳамда ўқ-дориларни сотиб олади ва ғарблик иттифоқчилар билан янада яқинроқ ҳамкорлик қилади. Бу ҳақда Financial Times нашри маълум қилди.
Украинанинг НАТО Таъминлаш ва харидлар бўйича агентлиги (NSPA) билан шерикликка киришиши мамлакатга қўшимча харид каналини тақдим этади.

Мазкур ҳамкорлик орқали томонларнинг ўзаро тизимли ишлашига шароит яратилади.

«Бу Украинага бизнинг имкониятларимизнинг кенг доирасидан: харидлар соҳасидаги эксперт билимлари, қўллаб-қувватлаш хизматлари ва ривожланган саноат базасига киришдан фойдаланиш учун янада тизимли асос яратиш имконини беради. Кўлам ҳисобига тежамкорликка эришилади», — деди Таъминлаш операциялари бўйича агентлик директори Жаклин Борсбум.

Маҳаллий компаниялар тендерларда иштирок этади

Нашрнинг қайд этишича, Украинага НАТО агентлиги орқали харидларни амалга оширишга рухсат берилиши жорий йилнинг апрель ойида қабул қилинган қарорга асосланади.

Унга кўра, Украина мудофаа компанияларига тегишли таъминот бўйича тендерларда қатнашишга рухсат берилган эди.

Шу муносабат билан, ўтган ҳафтада NSPA Киевда 150 га яқин Украина компаниялари иштирокида соҳавий тадбир ташкил қилди.

Мазкур тадбирда маҳаллий ишлаб чиқарувчилар қандай қилиб тегишли етказиб берувчи сифатида рўйхатдан ўтишлари ва шартномаларни қўлга киритиш учун танловларда иштирок этишлари мумкинлиги тушунтириб ўтилди.