Халқаро шахмат федерациясига янги президент сайланди

Қозоғистон шахмат федерацияси президенти Тимур Турлов Халқаро шахмат федерацияси (FIDE) президенти этиб сайланди. Сайлов 26 сентябрь куни Самарқандда 46-Бутунжаҳон шахмат олимпиадаси доирасида ташкилотнинг Бош ассамблеясида бўлиб ўтди.

Сайловнинг иккинчи турида Турлов 110 та овоз олди. Унинг рақиби, германиялик тадбиркор Вадим Розенштейн эса 85 та овоз тўплади.

Биринчи турда Турловни 96 нафар делегат қўллаб-қувватлаган бўлса, Розенштейн 76 та овоз олди. Германиялик яна бир номзод Ян Хенрик Бюттнер 20 та овоз тўплаб, кейинги босқичдаги курашни тарк этди. Биринчи турда жами 196 нафар делегат овоз берган, 4 та бюллетень ҳақиқий эмас деб топилган.

WR Chess асосчиси Вадим Розенштейн сайловда сингапурлик тадбиркор Гордон Танг билан биргаликда қатнашган. Унинг сайловолди жамоаси таркибига Ўзбекистон Миллий олимпия қўмитаси раисининг биринчи ўринбосари Отабек Умаров ҳам кирган.

Турлов билан биргаликда ягона президентлик рӯйхати асосида FIDE президенти ўринбосари этиб шахмат бўйича 15-жаҳон чемпиони Вишванатан Ананд сайланди. Турлов ва Ананд дастлаб сайловда бир жамоа сифатида қатнашган.

38 ёшли Тимур Турлов FIDE тарихида сайланган энг ёш президентлар орасида иккинчи ўринни эгаллади. У 2023 йилдан буён Қозоғистон шахмат федерациясига раҳбарлик қилиб келмоқда. Шунингдек, Турлов халқаро молиявий гуруҳ Freedom Holding Corp. асосчиси ва бош директори, Халқаро мактаб шахмати федерацияси раҳбари ҳисобланади.

Турлов FIDE президенти лавозимида 2018 йилдан буён федерацияни бошқариб келган Аркадий Дворковичнинг ўрнини эгаллади. Дворкович 2022 йилда иккинчи муддатга қайта сайланган, унингиккинчи муддатидаги ўринбосари эса Вишванатан Ананд бўлган.

Июль ойида Дворкович Европа Иттифоқининг санкциялар рўйхатига киритилганидан сўнг президентлик ваколатларини ихтиёрий равишда тўхтатган. У Европа Иттифоқининг қарорини «қонунга хилоф ва адолатсиз» деб атаб, уни баҳслашиш ниятида эканини билдирган. Шу билан бирга, санкциялар FIDE фаолиятининг барқарорлигига халақит бериши мумкинлигини сабаб қилиб, лавозимидан вақтинча четлаган.

Шундан сўнг президент вазифаларини Ананд бажарган.

Дворкович 2026 йилги сайловларда номзодини илгари сурмаган. Турлов аввал унинг жамоасида бўлган, бироқ Дворкович номзодини қўймасликка қарор қилганидан кейин Ананд билан биргаликда ўзининг президентлик рўйхатини шакллантирган.