Хорижга ишга юбориш хизматлари учун тўлов қилиб кетолмаганларга пуллари қайтарилади
Миграция агентлиги хорижга ишга юбориш хизматлари учун тўлов амалга оширган, бироқ хорижий иш берувчи томонидан юзага келган айрим ташкилий ёки бошқа ҳолатлар туфайли ишга жўнаб кетмаган фуқароларга тўланган маблағлар қайтарилишини маълум қилди.
© Илья Семендеев / SpotЎзбекистонда хорижга ишга жўнаш учун тўлов қилиб, ташкилий ёки бошқа сабабларга кўра кетолмаган фуқароларга маблағлари қайтарилади. Бу ҳақда Миграция агентлиги хабар берди.
Маълум қилинишича, 2023–2024 йилларда Ташқи меҳнат миграцияси агентлигига, 2025 йилда эса Миграция агентлигига хорижда ишлаш хизматлари учун тўлов амалга ошириб, бироқ жўнаб кетмаган шахслар пулларини қайтариб олиш ҳуқуқига эга. Қайтариш иш берувчи томонида юзага келган ташкилий ёки бошқа ҳолатлар туфайли ишга жўнаш имкони бўлмаган ҳолатларга татбиқ этилади.
Жараён тўлиқ рақамли шаклда амалга оширилади. Аризалар 2026 йил 20 мартгача қабул қилинади. Фуқаролар белгиланган «хорижда иш» онлайн платформаси орқали ариза топширади. Бунда ҳисоб яратиш, режалаштирилган иш мамлакати ва тўлов қилинган йилни танлаш талаб этилади.
Рўйхатдан ўтгандан сўнг, тўловни қайтариш ойнаси орқали зарур маълумотлар киритилади. Ариза берувчи фаол телефон рақами, тўланган аниқ сумма ва имкони бўлса, тўлов квитанциясини юклайди.
Банк реквизитларини тўғри киритиш муҳим ҳисобланади, чунки маблағлар тўғридан-тўғри пластик картага ўтказилади.
Барча маълумотлар юборилгандан сўнг, телефонга тасдиқловчи SMS хабар юборилади.
Миграция агентлиги маълумотларни текшириб, тасдиқланган ҳолатда пулларни кўрсатилган банк картасига ўтказади.
