АҚШ Кубага нисбатан янги босим сценарийсини муҳокама қилмоқда
Вашингтондаги муҳокамалар Кубага нисбатан янги, анча қаттиқ босим усуллари ишлаб чиқилаётганини кўрсатмоқда, бу эса минтақадаги вазиятни кескинлаштириши мумкин.
«Politico» нашри маълумотига кўра, АҚШ президенти Доналд Трамп маъмурияти Кубага нисбатан режимни алмаштиришга қаратилган янги сценарийларни кўриб чиқмоқда. Нашр манбаларининг таъкидлашича, муҳокама қилинаётган вариантлар орасида оролга нефт импортини тўлиқ тўсиб қўйиш, яъни де-факто денгиз қамалини жорий этиш ҳам бор.
Бу чора ҳозирча расман тасдиқланмаган бўлса-да, маъмуриятдаги айрим гуруҳлар томонидан фаол илгари сурилмоқда.
Икки манбанинг айтишича, ушбу ташаббусни Куба ҳукуматига кескин қарши бўлган доиралар қўллаб-қувватламоқда ва у АҚШ давлат котиби Марко Рубио томонидан ҳам маъқулланган. Шу билан бирга, Оқ уй ичида бундай кескин қадамнинг оқибатлари юзасидан жиддий баҳслар кетмоқда.
Муҳокамалар Куба иқтисодиёти аллақачон заифлашган бир пайтда олиб борилмоқда.
Нефт ва ҳуманитар хавф
«Politico»га кўра, Венесуэла нефти етказиб берилишининг қисқариши Куба иқтисодиётига катта зарба берган. Ҳавана илгари ушбу нефтнинг бир қисмини қайта сотиш орқали чет эл валютасини жалб қилиб келган. Тўлиқ блокада эса бу имкониятни бутунлай йўққа чиқаради.
Маъмурият ичидаги қарши тараф фикрича, нефт импортининг тўлиқ тўхтатилиши оролда кенг кўламли ҳуманитар инқирозга олиб келиши мумкин. Бироқ ташаббус тарафдорлари энергетик босимни «бўғувчи ҳалқа» деб атаб, уни режимни ағдаришнинг энг самарали усули сифатида кўрмоқда.
Манбалардан бирига кўра, Оқ уй Кубадаги ҳокимият алмашинувини «2026 йилда албатта содир бўладиган воқеа» сифатида кўраётгани ҳам муҳокамалар руҳиятини очиб беради.
Қонунлар ва сиёсий фон
Бу ҳаракатлар АҚШда 1994 йилда қабул қилинган LIBERTAD қонунига, яъни Ҳелмс–Бертон қонунига таянилиши мумкин. Ушбу ҳужжат Кубага қарши савдо ва молиявий эмбаргони қонун даражасида мустаҳкамлаб қўйган.
Республикачиларнинг «сорлочинлар» қаноти ташаббусни очиқ қўллаб-қувватламоқда. Хусусан, Флорида сенатори Рик Скотт «Кубага на цент, на нефт берилмаслиги керак», — дея баёнот берган.
Аввалроқ «The Wall Street Journal» АҚШ маъмурияти Куба ҳукумати ичида ҳокимиятни ағдаришга ёрдам бера оладиган шахс қидираётганини хабар қилган эди. Давлат департаменти эса Кубада «демократик ва АҚШ манфаатларига зид бўлмаган ҳукумат» бўлиши миллий хавфсизлик учун муҳимлигини таъкидламоқда.
