АҚШ Венесуэла ва Кубада режимни алмаштириш имконига эга — WSJ
WSJ таҳлилига кўра, АҚШ ва иттифоқчилар Венесуэла ҳамда Кубадаги диктатураларни бартараф этиш учун тарихий имкониятга эга.
The Wall Street Journal нашри таҳлилига кўра, Ғарбий яримшардаги демократиялар Венесуэла ва Кубадаги икки йирик авторитар режимдан халос бўлиш учун ноёб сиёсий фурсатга дуч келган. Нашр таъкидлашича, АҚШ ва унинг иттифоқчилари томонидан қилинган қатъий ва мувофиқлаштирилган ҳаракатлар ушбу мамлакатлар тақдирида ҳал қилувчи омилга айланиши мумкин.
Венесуэлада президент Николас Мадуро оппозицияга босимни кескин кучайтирмоқда. Хусусан, мухолифатдаги президент деб эътироф этилаётган Эдмундо Гонсалеснинг қариндошларидан бири 30 йилга озодликдан маҳрум этилган. Нодавлат ташкилотлар маълумотига кўра, 15 декабр ҳолатига мамлакатда қарийб 900 нафар сиёсий маҳбус сақланмоқда. Мухолифат етакчиси ва Нобел тинчлик мукофоти соҳиби Мария Корина Мачадо эса сиёсий маҳбусларга нисбатан суддан ташқари қатл таҳдидлари мавжудлигини билдирди.
Кубада ҳам вазият ўта оғир. Мамлакат иқтисодиёти таназзулга учраган, инфратузилма емиралган, аҳоли эса сув, уй-жой ва дори-дармон танқислигидан азият чекмоқда. 60 йилдан ортиқ вақтдан бери ҳокимиятда турган режим фуқаролик институтлари ва эркинликларни амалда йўқ қилган. WSJʼнинг қайд этишича, Хитой ва Россия Кубани Америка қитъасидаги геосиёсий таъсирини кенгайтириш учун фойдаланишда давом этмоқда.
Нашрга кўра, агар Венесуэла ва Кубада диктаторлик тузумлари ағдарилса, легитим мухолифат етакчилари давлат бошқарувини биринчи кундан қўлга олиш имконига эга бўлади. Бироқ Венесуэлага ҳуманитар инқирозни енгиб ўтиш, иқтисодиётни барқарорлаштириш ва давлат институтларини тиклаш учун кенг кўламли халқаро ёрдам зарур бўлади.
Кубада эса сиёсий-иқтисодий тизимни тубдан ислоҳ қилиш талаб этилади. АҚШ ва унинг иттифоқчилари олдидаги асосий вазифа — бевосита ҳарбий аралашувсиз, маҳаллий ташкилотлар ва фуқаролик жамиятига таянган ҳолда ўтиш даврини қўллаб-қувватлашдан иборат.
Экспертлар фикрича, ҳозирги вазият ўзига хос ва такрорланмас. Кечикиш режимларни янада мустаҳкамлаб, ташқи ўйинчиларнинг минтақадаги мавқеини кучайтириши мумкин. Шу сабаб Вашингтон ва унинг ҳамкорлари пострежим даври учун аниқ ва пухта режа ишлаб чиқиши ҳал қилувчи аҳамият касб этади.
