Австралия 16 ёшгача бўлганларга ижтимоий тармоқларни тақиқлаш бўйича қонунни кучайтирмоқда

Австралия ҳукумати душанба куни 16 ёшгача бўлган болаларнинг ижтимоий тармоқлардан фойдаланишига қўйилган тақиқни кучайтириш ҳамда интернет назорати органига (eSafety) йирик технологик компанияларни қоидабузарлик учун судга таъқиб қилишда кўпроқ ваколатлар тақдим этиш мақсадида парламентга янги қонун лойиҳасини киритди. Бу ҳақда «Reuters» агентлиги хабар берди.

Мазкур қарор дунёда биринчи бўлиб жорий этилган ва декабрь ойида кучга кирган чекловларга қарамай, орадан олти ой ўтиб болалар ҳамон платформаларга кира олаётгани ҳақидаги далиллар ортидан қабул қилинди. Бош вазир Энтони Албанезенинг маълум қилишича, ижтимоий тармоқларда ҳамон болалар жуда кўп ва технологик компаниялар тақиққа риоя қилиш учун етарлича ҳаракат қилмаяпти.

Шанба куни эълон қилинган ўзгаришларга мувофиқ, қоидабузарлик учун энг юқори жарима миқдори икки баробарга оширилиб, 49,5 миллион Австралия долларидан 99 миллион долларга (68,2 миллион АҚШ доллари) етказилади. Австралиянинг бу борадаги ҳаракатларини ўзларида шундай қонунларни ишлаб чиққан ёки қабул қилишга тайёргарлик кўраётган ўнлаб мамлакатлар яқиндан кузатиб бормоқда.

«Ифлос ўйинлар» ва текширувлар

Айни пайтда Австралия интернет назорати органи (eSafety) бешта платформа – «Meta»нинг «Facebook» ва «Instagram» тармоқлари, «Snapchat», «TikTok» ҳамда «Google»нинг «YouTube» хизматлари томонидан қоидаларнинг эҳтимолий бузилишини текширмоқда.

Алоқа вазири Аника Уэллсга кўра, янги қонун eSafety комиссарига компанияларнинг ички ёзишмалари ва бошқарув кенгаши баённомаларини талаб қилиш ваколатини беради ва бу компанияларга қарши очиладиган юридик ишларнинг имкон қадар кучли бўлишини таъминлайди. Қонун лойиҳасини парламентга киритар экан, Уэллс фирмаларни тақиққа қасддан амал қилмасликда ва уни четлаб ўтиш учун «ифлос ўйинлар» ишлатишда айблади. У Австралияда бизнес қилмоқчи бўлган компаниялар маҳаллий қонунларга бўйсуниши шартлигини таъкидлади.

Янги қонун кучга кириши учун парламент томонидан тасдиқланиши талаб этилади. Бош вазир Албанезе мухолифатдаги Коалицияни ушбу лойиҳани қўллаб-қувватлашга чақириб, дастлабки қонун ҳам икки партия томонидан маъқулланганини эслатиб ўтди.
Сиднейлик фуқаро Билл Райт ҳукуматнинг ижтимоий тармоқларни жавобгарликка тортиш бўйича бу қадамини қўллаб-қувватлашини, аммо белгиланаётган жарималар миқдори барибир етарли бўлмаслиги мумкинлигини билдирган. «Meta», «Google» ва «Snapchat» ҳозирча бу борада изоҳ бермади, «TikTok» эса изоҳ беришдан бош тортган.