Британиянинг собиқ бош вазири Зеленскийга маслаҳатчи бўлди

Буюк Британия собиқ бош вазири Риши Сунак Украина президенти ҳузуридаги иқтисодий тикланиш бўйича халқаро маслаҳат кенгаши аъзосига айланди. Бу ҳақда 27 феврал куни Британия ҳукумати расмий сайтида эълон қилинди. Сунак энди Володимир Зеленский ва унинг иқтисодий маслаҳатчиси, Канада собиқ бош вазири ўринбосари Христя Фриланд бошчилигидаги халқаро экспертлар гуруҳи таркибида фаолият юритади. Расмий хабарга кўра, собиқ бош вазирнинг ушбу янги лавозимдаги фаолияти учун ҳеч қандай иш ҳақи тўланмайди.

Риши Сунакнинг ушбу кенгашга қўшилиши Украина иқтисодиётини урушдан кейинги даврда ривожлантириш стратегиясини ишлаб чиқиш билан боғлиқ.

«Ғарбга кучли Украина керак, кучли Украинага эса кучли иқтисодиёт зарур», — дея таъкидлади Сунак «The Independent» нашрига берган интервюсида.

У Украина халқининг жасорати ва иродасини юқори баҳолаб, Британия ҳукумати раҳбари бўлган давридаёқ ушбу мамлакатни қўллаб-қувватлаш унинг учун шараф бўлганини қайд этди. Янги кенгаш Украинанинг молиявий барқарорлигини таъминлашда асосий роль ўйнайди.

Дунё гигантлари билан ҳамкорлик

Маслаҳат кенгашининг илк йиғилиши 27 феврал куни бўлиб ўтди. Унда Риши Сунак билан бирга Жаҳон банки президенти Аджай Банга, Европа тикланиш ва тараққиёт банки президенти Одил Рено-Бассо ҳамда дунёнинг энг йирик инвестиция компаниялари вакиллари иштирок этди. Жумладан, «Siemens», «BlackRock» ва «Citigroup» каби корпорациялар раҳбарлари Украинанинг иқтисодий истиқболларини муҳокама қилишди. Бундай юқори даражадаги экспертларнинг йиғилиши Киевга халқаро инвестициялар оқимини кучайтиришга қаратилган стратегик қадамдир.

Кенгаш таркибига кирган компаниялар ва молиявий институтлар Украинани қайта тиклаш жараёнида нафақат маслаҳат, балки реал лойиҳаларни молиялаштириш имкониятларини ҳам кўриб чиқмоқда. Халқаро экспертлар гуруҳи мамлакатнинг инвестиция муҳитини яхшилаш ва коррупцияга қарши курашиш механизмларини такомиллаштириш бўйича тавсиялар беради.

Асосий эътибор инфратузилмани қайта тиклаш ва энергетика хавфсизлигини таъминлашга қаратилади. Кенгаш аъзолари халқаро бозорларда Украинанинг иқтисодий манфаатларини илгари суриш ва донор давлатлар билан алоқаларни мувофиқлаштиришда иштирок этади.

Сунакнинг сиёсий портрети

Риши Сунак 2022 йил октябрдан 2024 йил июлгача Буюк Британия бош вазири лавозимида фаолият юритган. У Британиянинг замонавий тарихидаги энг ёш ҳукумат раҳбари сифатида тарихда қолди — тайинланган вақтида у 42 ёшда эди. Унинг бошқаруви даврида Британия Украинага энг йирик ҳарбий ва иқтисодий ёрдам берувчи давлатлардан бири бўлиб қолди.

Украинани қайта тиклаш бўйича халқаро конференциялар илгари Лугано ва Лондонда бўлиб ўтган эди. Ушбу тадбирларда триллионлаб долларлик маблағ зарурлиги айтилган.