Кичик бизнесни текширишга уч йиллик мораторий эълон қилинади

Шавкат Мирзиёев бошчилигида Хоразмда ўтказилаётган тадбиркорлар билан очиқ мулоқотда бизнесга маъмурий босимни кескин камайтириш кераклигини таъкидлади.

Қайд этилишича, сўнгги уч йилда солиқ юки 13,4 фоиздан 12 фоизга, ўн йилда яширин иқтисодиёт улуши 50 фоиздан 26 фоизга тушди.

Шунингдек, сўнгги ўн йилда яширин иқтисодиёт улуши 50 фоиздан 26 фоизгача қисқарган.

 «Иқтисодиётни «соя»дан чиқариш текшириш билан эмас, тадбиркорга йўл кўрсатиб, тўғри ишлашга ўргатиш орқали бўлиши керак», – деди Мирзиёев.

Шу муносабат билан кичик бизнес субъектларида инсон соғлиги ва бошқа тадбиркорлар манфаатига зарар етказиш билан боғлиқ бўлмаган ҳар қандай текширувга уч йиллик мораторий эълон қилиниши маълум қилинди.

Текширувлар сони қисқаради

Таҳлил қилинган 5 минг нафар тадбиркорнинг ярмидан кўпида бир йил давомида 2-3 марта солиқ текшируви ўтказилган. Уларнинг яна 21 фоизида эса текширувлар сони 4 мартадан ошган.

Бундан ташқари, тадбиркорлар фаолияти ёнғин хавфсизлиги, қурилиш, санитария, карантин ва энергия инспекциялари томонидан ҳам қайта-қайта текширилмоқда.

Президентнинг таъкидлашича, тадбиркор учун хотиржам ва барқарор муҳит яратиш эркинлик ҳамда ривожланишнинг асосий шартларидан бири ҳисобланади.

«Бир нарсани тушуниш керак: хотиржамлик бўлмаган жойда эркинлик ҳам, ривожланиш ва янгиликка интилиш ҳам бўлмайди», — деди давлат раҳбари.

Шу билан бирга, ўрта ва йирик тадбиркор ўз корхонасини ихтиёрий профилактик аудитдан ўтказса, унинг хулосасини солиқ органи тан олади. Камчиликни бартараф қилган тадбиркор жаримага тортилмайди, бир йилда такрорий текширув эса фақат Бизнес-омбудсман рухсати билан ўтказилади.