«Pegasus Airlines» O‘zbekistonning uchta shahriga parvozlarni boshlaydi

Turkiyaning arzon aviachiptalari bilan tanilgan «Pegasus Airlines» kompaniyasi O‘zbekiston bozoriga kirmoqda. Aviakompaniya rejasiga ko‘ra, Istanbuldan Buxoroga ilk parvoz 2026 yil 14-dekabrda, Andijonga 18-dekabrda, Termizga esa 2027 yil 1-martda amalga oshirilishi kerak.

Yangi yo‘nalishlar haqidagi ma’lumotlar aviakompaniyaning rasmiy sayti va mobil ilovasida joylashtirilgan. Chiptalar sotuvi ham boshlangan.

Parvozlar qachon boshlanadi va chiptalar qancha turadi?

Aviakompaniya e’lon qilgan jadvalga ko‘ra, yangi reyslar quyidagi sanalarda boshlanishi rejalashtirilgan:

Istanbul — Buxoro: 2026 yil 14-dekabr;
Istanbul — Andijon: 2026 yil 18-dekabr;
Istanbul — Termiz: 2027 yil 1-mart.

Yangi yo‘nalishlar bo‘yicha aviachiptalar narxi 99 dollardan boshlanadi. Yakuniy narx safar sanasi, tanlangan yo‘nalish va bo‘sh o‘rinlar soniga qarab o‘zgarishi mumkin.

Reyslar Istanbuldagi qaysi aeroportdan amalga oshiriladi?

Yangi yo‘nalishlar Istanbuldagi Sabixa Go‘kchen xalqaro aeroporti orqali tashkil etilishi kutilmoqda. Bu aeroport «Pegasus Airlines»ning muhim tranzit markazlaridan biri hisoblanadi.

Yangi reyslar Buxoro, Andijon va Termizdan Istanbulga bevosita borish imkonini beradi. Yo‘lovchilar, shuningdek, Istanbul orqali London, Manchester, Parij va Praga kabi Yevropa shaharlariga boshqa reyslar bilan o‘tish imkoniyatini ko‘rib chiqishi mumkin.

«Pegasus Airlines» O‘zbekistonda parvoz qilish uchun ruxsat olgan

O‘zbekiston Respublikasi Transport vazirligi huzuridagi Fuqaro aviatsiyasi agentligi reyestrida «Pegasus Airlines» kompaniyasi qayd etilgan. Hujjatga ko‘ra, aviakompaniya 2026 yil 6-oktabrda yo‘lovchi tashish uchun 58-K raqamli ekspluatatsion ruxsatnoma olgan.

Aviakompaniyaning O‘zbekiston bozoriga chiqish rejasi avval ham muhokama qilingan. 2019 yilda Turizmni rivojlantirish davlat qo‘mitasi vakillari «Pegasus Airlines» bilan mamlakatga parvozlarni yo‘lga qo‘yish bo‘yicha muzokaralar olib borilayotganini bildirgan.