Микромолия ташкилотларда муаммоли кредитлар қиймати 500 млрд сўмга яқинлашди
Ўзбекистондаги 138 та микромолия ташкилотининг жами активлари бир йил ичида 18,9 трлн сўмгача ошди. 17,4 трлн сўмлик кредит қолдиғида NPL улуши 2,6 фоизни ташкил қилмоқда.
2026 йил 1 август ҳолатида 138 та микромолия ташкилотининг (ММТ) жами активлари бир йил ичида 9,5 трлн сўмдан 18,9 трлн сўмгача ошган. Бу ҳақда Марказий банк эълон қилган статистикасида келтирилган.
Соф кредитлар ҳажми ҳам 8,7 трлн сўмдан 16,9 трлн сўмга етган. Энг кескин ўсиш TBC Kredit’да қайд этилиб, унинг активлари бир йилда 1,9 млрд сўмдан 1,1 трлн сўмга етган. Шу даврда соф кредитлар ҳажми 1 трлн сўмни ташкил қилган.
Активлари сезиларли даражада ошган микромолия ташкилотлари рўйхати қуйидагича:
MMT | 2025-yil aktivlari | 2026-yil aktivlari | Aktiv o‘sishi | 2026-yil sof kreditlari | NPL ulushi |
TBC Kredit | 1,9 mlrd so’m | 1,1 trln so’m | +620% | 1 trln so’m | 0,4% |
Ayol | 0,1 mlrd so’m | 12,3 mlrd so’m | +232% | — | — |
Community Microfinance | 2,0 mlrd so’m | 279,4 mlrd so’m | +139% | 265,1 mlrd so’m | — |
Bright Future financing | 2,1 mlrd so’m | 281,6 mlrd so’m | +133% | 257,9 mlrd so’m | — |
Urban Finance Solutions | 2,1 mlrd so’m | 147,1 mlrd so’m | +692% | 136,0 mlrd so’m | — |
Danweek founding | 5,5 mlrd so’m | 363,6 mlrd so’m | +648% | 260,9 mlrd so’m | — |
Fond Flow | 2,0 mlrd so’m | 131,1 mlrd so’m | +645% | 124,5 mlrd so’m | — |
Una Moliya | 1,8 mlrd so’m | 109,3 mlrd so’m | +600% | 40,5 mlrd so’m | — |
Cash point | 1,7 mlrd so’m | 84,7 mlrd so’m | +502% | 76,5 mlrd so’m | — |
Aloqa Finance Development | 8,2 mlrd so’m | 165,0 mlrd so’m | +191% | 154,0 mlrd so’m | 3,1% |
Активлари йирик микромолия ташкилотлари кўпроқ ошган
Йирик ташкилотларда активлар қанчага ошгани ва ўсиш кредит портфелида қандай акс этганини қуйидаги жадвал орқали кўриш мумкин:
Tashkilot | Aktivlar, 2025 | Aktivlar, 2026 | O‘zgarish | Sof kreditlar, 2026 | NPL ulushi |
Tezcoin | 2,2 trln so’m | 6,8 trln so’m | +206% | 6 ,3 trln so’m | 1,9% |
Oltin Yulduz Plus | 132,4 mlrd so’m | 403,5 mlrd so’m | +205% | 382,6 mlrd so’m | 3,8% |
Agat | 168,2 mlrd so’m | 399,1 mlrd so’m | +137% | 293,4 mlrd so’m | 2,8% |
Mabruk Finance | 19,6 mlrd so’m | 47,6 mlrd so’m | +143% | 38,5 mlrd so’m | 6,9% |
Barqaror Sarmoya Group | 37,0 mlrd so’m | 74,8 mlrd so’m | +102% | 68,1 mlrd so’m | 1,8% |
Kontakt Finance | 11,3 mlrd so’m | 23,9 mlrd so’m | +112% | 21,6 mlrd so’m | 1,9% |
Sarmoyachi Group | 22,8 mlrd so’m | 107,9 mlrd so’m | +373% | 91,4 mlrd so’m | — |
Tayan | 8,7 mlrd so’m | 46,9 mlrd so’m | +441% | 42,4 mlrd so’m | — |
Масалан, Tezcoin’нинг активлари 2,2 трлн сўмдан 6,8 трлн сўмга ошган. Oltin Yulduz Plus’да эса активлар 132,4 млрд сўмдан 403,5 млрд сўмга, Agat’да 168,2 млрд сўмдан 399,1 млрд сўмга етган.
Айрим ташкилотларда активлар пасайган
Сектор бўйича умумий активлар икки баробар ошганига қарамай, баъзи ташкилотларда аксинча камайиш юз берган:
● Yangi Finans’нинг активлари 149,2 млрд сўмдан 73,5 млрд сўмгача (-51%), соф кредитлари эса 116,1 млрд сўмдан 35,3 млрд сўмгача (-70%) камайган. Бу Yangi bank ва Yangi finance фаолияти 2026 йил бошида Марказий банк томонидан тўхтатилгани билан боғлиқ.
● Silver Finans’нинг активлари 4,2 млрд сўмдан 1,1 млрд сўмгача (-74%), соф кредитлари эса 2 млрд сўмдан 0,3 млрд сўмгача (-85%) тушган.
NPL улуши юқори микромолия ташкилотлари
2026 йил 1 август ҳолатига 138 та ММТнинг жами кредит қолдиғи 17,4 трлн сўмни ташкил қилган. Шундан 459,9 млрд сўми муаммоли кредитлар бўлиб, сектор бўйича NPL улуши 2,6 фоизга тенг.
Бироқ ташкилотлар кесимида кўрсаткичлар анча фарқли. NPL улуши энг юқори бўлган ММТлар қаторида Kreditomat Tashkent (72,9%), Silver Finans (65,2%), Sirius Kredit (56,3%) ва Chust RIR (43,3%) бор.
Шунингдек, Yangi Finans’да NPL улуши 37,4 фоиз, ROHAT’да 36,4 фоиз, Farovon Hayot’да 29,6 фоиз, Tashdi’да 29,6 фоиз ва Laym’да 27,3 фоизга етган.
Йирик кредит портфелига эга айрим ММТларда эса мазкур улуш нисбатан паст бўлган. Масалан, Tezcoin’да кредит қолдиғи 6,5 трлн сўм бўлса-да, муаммоли кредитлар улуши 1,9 фоизни, Fortuna Biznes’да 1,1 трлн сўмлик кредит қолдиғига нисбатан 0,8 фоизни ташкил қилган. TBC Kredit’да эса 1 трлн сўмдан ортиқ кредит қолдиғининг 0,4 фоизи муаммоли кредитлар ҳисобига тўғри келган.
