Nurafshon shahrida 7 oktyabrdan ikki yangi avtobus yo‘nalishi ishga tushadi

Toshkent viloyati Nurafshon shahrida 7 oktyabrdan boshlab yangi jamoat transporti yo‘nalishlari ishga tushadi. Loyiha O‘zbekiston Prezidentining 2024 yil 5 noyabrdagi 384-sonli qarori asosida amalga oshirilmoqda. Bu haqda Toshkent viloyati hokimligi matbuot xizmati ma’lum qildi. Yangi avtobus yo‘nalishlarining asosiy maqsadi — aholi uchun qulay, xavfsiz va arzon transport xizmatini ta’minlashdir. Marshrutlar shaharning aholisi zich tumanlarini bir-biri bilan bog‘lab, yo‘lovchilar harakatini yengillashtirishi kutilmoqda. Birinchi yo‘nalish — «Qorasuv – Burgalik» marshruti bo‘lib, shaharning muhim mahallalari orqali o‘tadi. Ikkinchi yo‘nalish esa «Makro» supermarketidan boshlanib, Bobur ko‘chasi, Degantepa mahallasi va Nurafshon City orqali harakatlanadi. Avtobuslar har kuni soat 06:00 dan 22:00 gacha qatnaydi. Mutaxassislar aytishicha, yo‘nalishlar aholining kundalik ehtiyojlariga mos ravishda shakllantirilgan bo‘lib, ish, ta’lim va savdo markazlariga tez yetib borish imkonini beradi.