Ўзбекистонда АИ-92 бензини нархи рекорд даражада қимматлади

Ўзбекистон республика товар-хомашё биржасида АИ-92 маркали автомобил бензинининг нархи тарихий рекордни янгилади ва бир тоннаси учун салкам 14 миллион сўмга етди. Бу ҳақда биржа савдолари маълумотларига таяниб «Spot» нашри хабар бермоқда.

Июн ойи бошидан буён ёқилғи нархи қарийб 11,8 фоизга қимматлашган ва айни вақтда биржада таклиф ҳажми кескин камайган. Маълум қилинишича, 29 июн куни АИ-92 бензинининг бир тоннаси учун нарх 13,919 миллион сўмгача кўтарилган ва бу янги мутлақ рекорд ҳисобланади.

Нархларнинг энг кескин ўсиши ойнинг биринчи ярмида кузатилган: 4 июн куни бир тонна бензин 12,476 миллион сўм турган бўлса, 8 июнга келиб унинг нархи тўрт кун ичида 10,5 фоизга ошиб, 13,788 миллион сўмга етган. Кейинги икки ҳафта давомида нарх 13,7−13,8 миллион сўм оралиғида тебраниб турган, 29 июнга келиб эса яна кўтарилиб, тарихий максимумга чиққан.

Нарх ўсиши билан бир вақтда биржадаги ёқилғи таклифи ҳажми ҳам қисқариб кетган. Хусусан, 1 июнда 3791 тонна бензин таклиф этилган бўлса, 23 июнга келиб бу кўрсаткич деярли икки баробарга камайиб, 1898 тоннани ташкил этди. 29 июнга келиб таклиф ҳажми яна 3123,2 тоннагача ошган бўлса-да, нарх пасаймаган.

Россиядаги тақчилликнинг таъсири

Бензин нархларининг кескин сакраши Россия бозорида юзага келган ёқилғи танқислиги билан бир вақтга тўғри келмоқда. Бунга Украина дронлари зарбаларидан сўнг Россия нефтни қайта ишлаш заводларида режадан ташқари таъмирлаш ишлари олиб борилаётгани сабаб бўлган.

Бундан ташқари, Россияда 1 апрелдан бошлаб бензин экспортига тўлиқ тақиқ жорий этилган эди. Бироқ мазкур чеклов ҳукуматлараро келишувлар асосида амалга ошириладиган етказиб беришларга тааллуқли эмас, шу боис у Ўзбекистонга татбиқ этилмайди.