O‘zbekistonda biznesmenlarning kredit olishi 20 foizga oshdi

2026 yil yanvar–mart oylarida O‘zbekistonda mikro, kichik va o‘rta biznes subyektlarini kreditlash hajmi o‘tgan yilning shu davriga nisbatan 20,2 foizga o‘sib, 35,1 trln so‘mni tashkil etdi. Bu haqda O‘zbekiston Markaziy banki ma’lumot berdi.

Umuman olganda, joriy yilning birinchi choragida mamlakat iqtisodiyotiga barcha moliyalashtirish manbalari hisobidan 89,9 trln so‘m kredit mablag‘lari yo‘naltirildi. Bu ko‘rsatkich 2025 yilning mos davriga nisbatan 9,1 foizga ko‘p.

^{Manba: Markaziy bank}

Davlat tomonidan tadbirkorlikni qo‘llab-quvvatlash dasturlari doirasida ajratilgan kreditlar hajmi yillik hisobda 11 foizga o‘sib, 7 992 mlrd so‘mni tashkil qildi.

Ajratilgan mablag‘larning asosiy qismi «Mahalla» loyihasi doirasiga to‘g‘ri kelib, ushbu yo‘nalishda 4 260 mlrd so‘m kredit berildi. Bu esa o‘tgan yilga nisbatan 36 foizlik o‘sishni anglatadi.

Shuningdek, kichik biznesni uzluksiz qo‘llab-quvvatlash dasturi bo‘yicha 1 331 mlrd so‘m kredit ajratildi. Bu mablag‘lar o‘tgan yilga nisbatan 12 foizga ko‘payib, amal qilib kelayotgan korxonalar faoliyatini kengaytirishga yo‘naltirilgan.

Oilaviy tadbirkorlik dasturi doirasida 1 253 mlrd so‘m, «Birinchi qadam» tashabbusi bo‘yicha esa 1 149 mlrd so‘m kredit ajratildi. Ushbu dasturlar asosan yangi biznesni yo‘lga qo‘yayotgan tadbirkorlarni qo‘llab-quvvatlashga xizmat qilmoqda.

^{Manba: Markaziy bank}

Hududlar kesimida

Eng yuqori natija Samarqand viloyatida qayd etilib, umumiy kredit hajmi 5 716 mlrd so‘mga yetdi.

Samarqand viloyatida kreditlar o‘sishi 69,4 foizni tashkil etdi. Bu ko‘rsatkich o‘tgan yilning shu davridagi 3 374 mlrd so‘mga nisbatan ancha yuqori bo‘lib, hududda iqtisodiy faollik kuchayganini ko‘rsatadi.

Ikkinchi o‘rinni Farg‘ona viloyati egallab, kreditlar hajmi 5 703 mlrd so‘mni tashkil qildi. Ushbu hududda o‘sish sur’ati 41,3 foiz bo‘lib, 2025 yildagi 4 037 mlrd so‘mdan sezilarli oshgan.

Keyingi o‘rinlarda Toshkent viloyati, Buxoro viloyati va Xorazm viloyati qayd etildi. Toshkent viloyatida kreditlar 3 553 mlrd so‘mga yetgan bo‘lsa, Buxoroda bu ko‘rsatkich 3 568 mlrd so‘mni tashkil qildi. Xorazm viloyatida esa kredit hajmi 3 619 mlrd so‘mga yetdi. Ushbu uch hududda ham o‘sish sur’atlari 41–46 foiz oralig‘ida bo‘lib, barqaror o‘sish dinamikasini namoyon etdi.

Jumladan, Buxoro viloyatida o‘sish 45,8 foizni, Xorazm viloyatida esa 45,5 foizni tashkil etdi. Bu hududlarda tadbirkorlikni qo‘llab-quvvatlash va moliyaviy resurslarga kirish imkoniyatlari kengayganini ko‘rsatadi.

^{Manba: Markaziy bank}