O‘zbekistonda dam olish kunlari harorat pasaya boshlaydi

O‘zbekistonga hafta oxirida harorat pasayishi mumkin. Bu haqda O‘zgidromet xabar berdi. 12-13 sentyabr kunlari mamlakatning asosiy qismida quruq va nisbatan issiq ob-havo saqlanib turadi. Havo harorati +30...+35 daraja, janubiy viloyatlarda esa +37...+39 darajaga yetishi kutilmoqda. Shu bilan birga, Qoraqalpog‘iston Respublikasi va Xorazmda qisqa muddatli yomg‘ir yog‘ishi, momaqaldiroq kuzatilishi mumkin. Bu hududlarda kunduzgi harorat +20...+25 darajagacha pasayadi. Shimoliy va cho‘l hududlarIda shamol kuchayishi, ayrim joylarda chang-to‘zon kuzatilishi ehtimoli bor. Yakshanba kuni respublika bo‘ylab harorat pasayib, kunduzi +25...+30 daraja, janubiy viloyatlarda esa +33...+35 darajadan oshmaydi. Toshkent shahrida juma kuni harorat +33...+35 daraja, shanba kuni +31...+33 daraja, yakshanba kuni esa +27...+29 daraja bo‘lishi kutilmoqda. Shamol sharqdan esib, sekundiga 10–12 metrgacha kuchayishi mumkin. Kechasi poytaxtda harorat +16...+19 darajada saqlanadi. Keyingi haftaning birinchi yarmida ham respublikaga salqin havo massalari kirib kelishi davom etadi. Kechasi harorat +10...+15 darajagacha, kunduzi esa +20...+25 darajagacha pasayishi mumkin. Ayrim hududlarda qisqa muddatli yomg‘ir yog‘ishi va momaqaldiroq kuzatilishi ehtimoldan xoli emas.