Президент йил охиригача 1800 та автобус харидини молиялаштиришни топширди

Президент Шавкат Мирзиёев 7-май куни ҳудудларда жамоат транспорти тизимини янада яхшилаш ва бу борадаги ишларни жадаллаштириш юзасидан тақдимот билан танишганидан сўнг, мутасаддиларга жорий йил охиригача 1800 та ҳаракат таркибини харид қилиш бўйича топшириқ берди. Бу ҳақда транспорт вазири Илҳом Маҳкамов «Ўзбекистон 24» телеканалига берган интервюсида маълум қилди. 

«Президентимиз бизга алоҳида топшириқ бердилар, яъни 2026-йил охиригача 1800 та ҳаракат таркибини харид қилиш мақсадида тадбиркорларга алоҳида банк кредитларини олиш учун ресурс ажратиш, қисқа муддатга зарур имтиёзларни бериш бўйича. Бу жамоат транспорти йўналишидаги ислоҳотларнинг якуний натижасига эришишга имконият яратади», – дейди вазир.

100 млн доллар кредит

Ўзмиллийбанк раисининг биринчи ўринбосари Сардорбек Усмонбеков эса президент янги имтиёзли шартларда кредит линияларини жалб қилиш ва тадбиркорларга янги автобуслар сотиб олиш учун маблағ йўналтириш бўйича топшириқ берганини маълум қилди. Унинг сўзларига кўра, банк аллақачон Хитойнинг бир қатор банклари билан келишувларга эга.

2026-йилда банк 1000 га яқин автобус етказиб бериш учун жами 100 млн доллар миқдорида кредит ажратишни режалаштирмоқда, шундан 600 таси газ двигателли, 400 таси эса электробуслар бўлади. Бундан ташқари, ҳокимликлар ва Транспорт вазирлиги билан биргаликда кредит портфелини шакллантириш ва ушбу лойиҳаларни амалга ошириш бўйича ишлар олиб борилмоқда.