Тожикистонда Starlink сунъий йўлдош интернети ишга тушди
Тожикистон Starlink технологияларидан расман фойдаланаётган Марказий Осиёдаги иккинчи давлатга айланди.
SpaceX компаниясининг Starlink тармоғи Тожикистоннинг бутун ҳудудида юқори тезликдаги интернет хизматларини кўрсата бошлади. Сигнал кечикиши паст бўлган тизимнинг ишга туширилиши мамлакатнинг энг чекка ва баланд тоғли ҳудудларини ҳам алоқа билан таъминлаш имконини беради. Бу ҳақда Илон Маск Х ижтимоий тармоғида маълум қилди.
Унинг айтишича, бу Тожикистон ҳукумати ва Америка компанияси ўртасида 2025 йил охирида имзоланган лицензия келишуви натижасида амалга оширилган. Ҳамкорликнинг асосий мақсади республиканинг бориш қийин бўлган ҳудудларини кенг кўламли рақамлаштириш эди.
«Тожикистонда Starlink юқори тезликдаги, паст кечикишли интернетдан фойдаланиш имконияти пайдо бўлди!», - дейилади Маск хабарида.
Тожикистон минтақада SpaceX технологияларидан расман фойдаланиш имкониятига эга бўлган иккинчи давлат бўлди. Биринчиси Қозоғистон бўлиб, у ерда тармоқ 2025 йил августдан бери фаолият юритиб, чекка қишлоқ жойлардаги турар-жой бинолари ва ижтимоий объектларни интернет билан таъминлаб келмоқда.
Starlink ишга туширилиши кутилаётган минтақанинг кейинги мамлакати Ўзбекистон бўлади. Тармоқнинг Ўзбекистон бозорига кириши 2026 йилга режалаштирилган. Республика ҳукумати аллақачон терминаллардан фойдаланиш қоидаларини белгилаб, тегишли имтиёзларни назарда тутган ҳолда меъёрий ва солиқ базасини тайёрлашни якунлади.
