Трамп Венесуэлага қарши нефт блокадасини эълон қилди

АҚШ президенти Доналд Трамп Венесуэлага нефт олиб кираётган ёки мамлакатдан нефт олиб чиқаётган барча санкция остидаги танкерларга нисбатан тўлиқ блокада жорий этилганини маълум қилди. Унинг айтишича, Кариб денгизи ҳудудига Жанубий Америка тарихидаги «энг катта ҳарбий армада» жойлаштирилган ва у Венесуэла ҳокимияти АҚШга «ўғирланган нефт, ер ва бошқа активларни қайтармагунча» кенгайтириб борилади.

Трамп TruthSocial ижтимоий тармоғидаги баёнотида Венесуэла президенти Николас Мадуро бошчилигидаги ҳокимиятни «ноқонуний режим» деб атаб, ушбу нефт даромадлари наркотерроризм, одам савдоси, қотиллик ва одам ўғирлашни молиялаштиришга йўналтирилаётганини таъкидлади. Шунингдек, у АҚШ Венесуэла ҳокимиятини расман «хорижий террористик ташкилот» сифатида тан олганини эслатди.

Охирги ойларда АҚШ Кариб денгизи ҳудудига ҳарбий кучларини босқичма-босқич жойлаштириб, Венесуэлага тегишли кемаларга қарши зарбалар бериб келмоқда. Вашингтон бу ҳаракатларни наркотиклар контрабандасига қарши кураш билан изоҳлаган. Ноябр ойи ўрталарига келиб, минтақада 15 мингга яқин америкалик ҳарбий хизматчи жойлашгани маълум қилинган.

10 декабр куни АҚШ Венесуэла соҳиллари яқинида Skipper номли нефт танкерини ушлаб қолганини эълон қилди. The New York Times маълумотларига кўра, мазкур кема жорий йил феврал–июл ойларида Эрондан Хитойга қарийб 2 млн баррел нефт ташиган. The Washington Post эса АҚШ Венесуэла билан боғлиқ яна бир қатор танкерларни кузатув остига олганини хабар қилди.

Венесуэла ҳокимияти мазкур ҳаракатларни «халқаро қўлбола қароқчилик» деб атаб, Вашингтоннинг асл мақсади мамлакатнинг нефт ва энергия ресурсларини назорат қилиш эканини билдирди. Reuters маълумотларига кўра, ноябр ойидаги махфий музокараларда Трамп Мадурога мамлакатни тарк этиш учун бир ҳафта муҳлат берган, аммо Мадуро томонидан илгари сурилган амнистия ва санкцияларни бекор қилиш шартлари рад этилган.