Зеленский яқинда Трамп билан учрашишини эълон қилди
Украина президенти Доналд Трамп билан олий даражадаги музокаралар яқин кунларда ўтказилишини билдирди.
Украина президенти Володимир Зеленский яқин вақт ичида АҚШ президенти Доналд Трамп билан учрашув ўтказиш режалаштирилаётганини маълум қилди. Унинг сўзларига кўра, мазкур мулоқот Украина атрофидаги сиёсий ва хавфсизлик масалаларида муҳим қарорлар қабул қилиниши мумкин бўлган даврга тўғри келмоқда.
Зеленскийнинг таъкидлашича, Украина Миллий хавфсизлик ва мудофаа кенгаши котиби Рустем Умеров Америка томони билан олиб борилган навбатдаги алоқалар ҳақида ахборот берган.
Украина президенти ушбу жараённи тезлаштириш зарурлигини таъкидлаб, қуйидагиларни ёзган:
«Бир кунимизни ҳам бой бермаймиз. Яқин кунларда президент Трамп билан олий даражада учрашишга келишиб олдик. Янги йилгача кўп нарса ҳал бўлиши мумкин».
Шу билан бирга, Оқ уй ҳозирча Доналд Трампнинг Украина етакчиси билан учрашуви бўйича расмий тасдиқ бермади. Бу эса музокаралар формати ва аниқ санаси бўйича аниқлик йўқлигини кўрсатмоқда.
Яқинда Рустем Умеров Флорида штатидан жой олган Доналд Трампнинг махсус вакиллари Стив Уиткофф ва Жаред Кушнер билан учрашган. Ушбу мулоқотларда АҚШ томонидан ишлаб чиқилган тинчлик режасининг асосий жиҳатлари муҳокама қилингани хабар қилинган.
24 декабр куни Зеленский АҚШ, Европа ва Россия билан ўтказилган сўнгги музокаралар натижасида шаклланган режанинг ҳозирги вариантини очиқлади. Унинг айтишича, ҳужжат 20 банддан иборат бўлиб, Донбасс устидан назорат ва Запороже атом электр станциясини бошқариш масалалари бўйича келишмовчиликлар сақланиб қолмоқда.
Маълумот ўрнида, Володимир Зеленский 2025 йил давомида Доналд Трамп билан музокаралар ўтказиш мақсадида АҚШга уч марта ташриф буюрган. Охирги сафар учрашув 17 октябрда бўлиб ўтган эди.
