«Iman Holding» Ҳасанхон Яҳё Абдулмажид бошчилигида янги шаръий кенгаш тузади

«Iman Holding» компанияси таниқли диний уламo Ҳасанхон Яҳё Абдулмажид бошчилигида янги шаръий кенгаш ташкил этилишини расман эълон қилди.

Компания маълум қилишича, янги кенгашни шакллантириш ишлари бошланган. «Iman Holding» ушбу қадам компания ва инвесторлар учун хайрли бўлишига умид билдирган.

Шунингдек, компаниянинг янги бошқарув жамоаси мавжуд камчиликларни бартараф этиш ва менежмент фаолиятини янада профессионаллаштириш учун зарур ўзгаришларни амалга оширишга тайёрлигини билдирган.

Баёнотда Ҳасанхон Яҳё Абдулмажидга компания таклифига розилик билдиргани учун миннатдорлик ҳам билдирилган.

«Айни вазиятда биз инвесторлар ва кузатувчиларнинг қўллаб-қувватлаши ҳамда тушунишига ҳар қачонгидан кўпроқ муҳтожмиз», — дейилади компания хабарида.

Ўзи нима бўлган эди?

«IMAN Invest» атрофидаги можаро 25-октябр куни Ислом молиясини мувофиқлаштириш кенгаши (IFCB) компания билан ҳамкорликни тўхтатганини эълон қилганидан кейин кенг жамоатчилик муҳокамасига айланди.

IFCB вакили, ислом молияси бўйича аудитор Маҳмуд Усмон компанияда инвесторлар маблағларидан фойдаланиш, молиявий ҳисоб-китоблар ва шариат талабларига риоя этилиши билан боғлиқ жиддий муаммолар борлигини билдирди. Унинг таъкидлашича, компаниянинг қарийб 70 миллион долларлик портфелида 20 миллион долларлик тафовут аниқланган.

26-октябр куни Маҳмуд Усмон компания фаолиятига оид тафтиш ҳужжатларини ҳам эълон қилди. Уларда бир нечта асосий масала кўтарилган: 9,5 миллион долларлик муддати ўтган қарзлар, бошқарув компаниясининг инвестиция фонди олдидаги 2,97 миллион долларлик қарзи, инвесторлар маблағлари ҳисобидан амалга оширилган айрим харидлар ва дивидендларни ҳисоблаш тартиби.

Хусусан, тафтиш ҳужжатларида 2026-йил 31-май ҳолатига BNPL портфелидаги муддати ўтган муаммоли қарзлар 9,5 миллион доллар ёки портфелнинг 17–18 фоизини ташкил этгани қайд этилган. Шунингдек, Рустам Раҳматов фойдаланиши учун инвесторлар маблағлари ҳисобидан 128 минг долларлик Mercedes-Benz S500 харид қилингани ва BYD Champion автомобили бўйича тўловлар кечиктирилгани масалалари ҳам кўтарилган.

Компания асосчиси Рустам Раҳматов эса ўз баёнотида айбловларни рад этди. У келишмовчиликлар ортида Маҳмуд Усмон билан юзага келган шахсий ва ишга оид низолар, жумладан, хизмат ҳақи ва компаниядаги улуш масалалари турганини билдирди.

27-октябр куни «IMAN Holding» Кузатув кенгаши расмий муносабат эълон қилди. Унда компания 20 миллион долларлик реал зарар ёки камомад мавжудлиги ҳақидаги даъволарни рад этди. «IMAN Holding» бу суммани учта турли молиявий кўрсаткичнинг умумлаштирилган талқини деб изоҳлади: 3,5 миллион долларлик захира билан қопланмаган кредит риски, бошқарув компаниясининг 2,97 миллион долларлик қарзи ва насия савдо портфели билан инвесторлар портфели ўртасидаги 140,75 миллиард сўмлик фарқ.

Компания муаммоли қарзлар масаласида ҳам IFCB келтирган рақамларни бошқача изоҳлади. Унинг таъкидлашича, муддати ўтган қарзлар билан NPL — қайтмаслиги кутилаётган муаммоли қарзлар бир хил тушунча эмас. Компания амалиётида қарзлар 300 кундан кейингина умидсиз деб баҳоланади.

«IMAN Holding» маълумотига кўра, 2026-йил 31-май ҳолатида NPL 58,79 миллиард сўмни ёки 618,41 миллиард сўмлик портфелнинг 9,5 фоизини ташкил этган. 1-октябрга келиб эса муаммоли қарзларнинг мутлақ миқдори 71,65 миллиард сўмга етган, бироқ портфель ҳажми ҳам кенгайгани сабабли уларнинг улуши 6,5 фоизгача тушган. Компания ушбу хатарларни қоплаш учун 31,91 миллиард сўмлик ECL захираси шакллантирилганини билдирган.

Бошқарув компаниясининг фонд олдидаги 2,97 миллион долларлик қарзи бўйича эса «IMAN» бу маблағлар амалдаги оммавий оферта асосида, фоизсиз ажратилганини таъкидлаган. Бироқ компаниянинг ўзи ҳам тафтиш комиссияси ушбу амалиётни нотўғри деб топганидан сўнг, июль ойида бундай қарз бериш тўхтатилганини тан олган. Қолган қарзларни 2026-йил ноябридан бошлаб олти ой ичида қайтариш режалаштирилган.

Автомобиллар билан боғлиқ масалаларда ҳам компания ўз изоҳларини тақдим этди. Унга кўра, Mercedes-Benz S500 автомобили 12-август куни сотилган ва харид учун сарфланган маблағ ҳамда ижара тўловлари фондга қайтарилган. BYD Champion бўйича эса Рустам Раҳматов 31-июл куни қолган 366,94 миллион сўмлик қарздорликни тўлиқ тўлаган.

Шу билан бирга, дивидендларни мижозлардан пул келиб тушишидан олдин тан олинган даромад асосида ҳисоблаш, бошқарув харажатларини фонд зиммасига юклаш ва янги оммавий оферта шартлари бўйича ҳам томонлар ўртасида келишмовчиликлар юзага келди. Компания 28-октябр куни инвесторларнинг янги оферта бўйича эътирозларига ҳам алоҳида жавоб берди.

Можаро ортидан компания бошқарувида ҳам ўзгаришлар эълон қилинди. Рустам Раҳматов ижроия бошқарувни мутахассисларга топшириб, Кузатув кенгашида фаолиятини давом эттириши маълум қилинди. Шунингдек, компания фаолиятини мустақил аудитдан ўтказиш режалаштирилгани билдирилди.