АҚШ ва Россия миллиардлаб долларлик нефт битимини муҳокама қилмоқда — ОАВ
Эҳтимолий келишувни Вашингтон Украина ҳудудидаги ҳарбий ҳаракатлар якунланишидан олдин тузишни таклиф қилган. Қўшма Штатлар битимда Халқаро тараққиёт молия корпорацияси орқали иштирок этмоқда, иштирокчилар сифатида америкалик молиячи, шунингдек, Қатар ва БАА бизнесменлари ҳам тилга олинган.
© ShutterstockМосква ва Вашингтоннинг Украина бўйича музокаралари «энди кенгайиб, миллиардлаб долларлик нефт битимини ҳам ўз ичига олган». Бу ҳақда «The New York Times» хабар берди.
Нашр музокаралар жараёнидан хабардор манбаларга таяниб, гап бутун дунё бўйлаб «Лукойл»га тегишли нефт конлари, нефтьни қайта ишлаш заводлари ва автомобилларга ёнилғи қуйиш шохобчалари ҳақида кетаётганини ёзмоқда. Улар қаторига АҚШдаги АЁҚШлар, Шарқий Европадаги нефтьни қайта ишлаш заводлари ва бошқа ҳудудлардаги нефт конлари киради.
Қайд этилишича, эҳтимолий келишувни АҚШ Украина ҳудудидаги ҳарбий ҳаракатлар якунланишидан олдин тузишни таклиф қилган. АҚШ битимда Халқаро тараққиёт молия корпорацияси орқали иштирок этмоқда, иштирокчилар сифатида америкалик молиячи Тодд Боулини, шунингдек, Қатар ва БАА бизнесменлари ҳам тилга олинмоқда.
Нашрнинг ёзишича, битим масаласи Россия президенти Владимир Путиннинг президент Доналд Трампнинг махсус вакиллари Стив Уиткофф ва Жаред Кушнер билан сентябр ойидаги учрашувида ҳам кўтарилган.
Маълумот учун, «Лукойл» — дунёдаги энг йирик вертикал интеграциялашган нефт-газ компанияларидан бири. Унинг улушига жаҳон нефт қазиб олишининг 2 фоиздан ортиғи ва тасдиқланган углеводород захираларининг қарийб 1 фоизи тўғри келади.
