Бой бўлишнинг 21-асрдаги энг тезкор йўли: Anthropic'нинг битта ходим учун сарфи 100 минг доллардан ошди

«Claude» сунъий интеллект тизимини ишлаб чиқувчи «Anthropic» компанияси 2026 йилнинг учинчи чорагида ходимлари билан боғлиқ харажатлар учун 1,7 млрд доллардан ортиқ маблағ сарфлади. Ҳисоб-китобларга кўра, бу ҳар бир ходимга ойига ўртача 107,6 минг доллардан тўғри келади.

Компаниянинг АҚШ Қимматли қоғозлар ва биржалар комиссиясига (SEC) 2 ноябрь куни тақдим этган янгиланган IPO ҳужжатларида маълум қилинишича, 2026 йил 30 сентябрь ҳолатига «Anthropic»да тахминан 5 300 нафар ходим ишлаган. Учинчи чорак (июль–сентябрь ойлари)да ходимлар билан боғлиқ умумий харажатлар 1,711 млрд долларни ташкил этган.

Мазкур харажатларнинг 1,07 млрд доллари ёки қарийб 62,5 фоизи акциялар билан боғлиқ мукофотларга тўғри келган. Қолган қисми иш ҳақи, бонуслар, ходимлар имтиёзлари ва иш берувчи тўлайдиган солиқлардан иборат. Шу боис бир ходимга ойига тўғри келадиган 107,6 минг доллар унинг ҳақиқий маоши эмас, балки компаниянинг ходимлар учун ўртача харажатидир.

Компаниянинг тушуми ҳам жадал ўсмоқда. 2026 йилнинг дастлабки тўққиз ойида «Anthropic» 33,2 млрд долларлик тушум олган. Ўтган йилнинг шу даврида бу кўрсаткич 2,5 млрд доллар бўлган. Шунингдек, ходимлар билан боғлиқ харажатлар 1,027 млрд доллардан 4,863 млрд долларга етган.

Айни пайтда компаниянинг энг йирик харажат йўналиши ходимлар эмас, балки сунъий интеллект моделларини ишлатиш учун зарур ҳисоблаш қувватлари ва инфратузилмадир. Учинчи чоракда бу мақсадлар учун 9,86 млрд доллар сарфланган. Компаниянинг операцион натижаси эса иккинчи чоракдаги 974 млн доллар фойдадан учинчи чоракда 567 млн доллар зарарга ўзгарган.

«Anthropic» айни пайтда акцияларини биржага чиқаришга тайёргарлик кўрмоқда. IPO ҳужжатларида ходимларга берилган акциявий мукофотлар бўйича ҳали харажат сифатида тан олинмаган компенсация қиймати 32,3 млрд долларга етгани ҳам қайд этилган. Биржага чиқиш жараёни ушбу харажатларнинг молиявий ҳисоботларда акс этишига ҳам таъсир кўрсатиши мумкин.