Endi bank kartalarini bir joydan tekshirish imkoni paydo bo‘ladi

Bundan buyon fuqarolar o‘z nomiga rasmiylashtirilgan bank kartalari haqidagi ma’lumotlarni bir joydan tekshirishi imkoniyatiga ega bo‘ladi. Bu foydalanuvchiga qaysi banklarda uning nomiga karta rasmiylashtirilganini elektron shaklda ko‘rish imkonini beradi.

Buning uchun MyGov portalining «Bank kartalari» bo‘limiga kirish kerak. Xizmat orqali foydalanuvchining nomiga rasmiylashtirilgan bank kartalari haqidagi ma’lumotlar ko‘rsatiladi.

Yangi kartaga ham onlayn buyurtma berish mumkin

Portal orqali mavjud kartalar haqidagi ma’lumotlarni ko‘rishdan tashqari, yangi bank kartasiga ham onlayn buyurtma berish mumkin.

Buning uchun MyGov’dagi tegishli xizmatga kirib, ro‘yxatda ko‘rsatilgan banklardan birini tanlash va elektron ariza yuborish kerak. Shundan so‘ng kartani chiqarish jarayoni tanlangan bank tomonidan amalga oshiriladi.

Kartani chiqarish uchun olinadigan to‘lov miqdori yagona tarif asosida emas, balki tegishli tijorat banki tomonidan belgilanadi.

Bu imkoniyat nima beradi?

Avval fuqaro o‘z nomiga qaysi bank kartalari rasmiylashtirilganini aniqlash uchun tegishli banklarga murojaat qilishi yoki banklarning turli ilovalaridan foydalanishiga to‘g‘ri kelishi mumkin edi. Yangi xizmat esa bunday ma’lumotlarni yagona portal orqali ko‘rish imkonini beradi.

Bu fuqaro turli vaqtlarda bir nechta bankda karta ochgan holatlarda qulay bo‘lishi mumkin. Foydalanuvchi o‘z nomiga rasmiylashtirilgan kartalar ro‘yxatini bir joydan ko‘rib, qaysi kartalardan foydalanayotgani yoki foydalanmayotganini bilishi mumkin.

Shuningdek, xizmat bank kartalari bilan bog‘liq ma’lumotlarni nazorat qilish imkonini beradi. Fuqaro nomidagi kartalar haqidagi ma’lumotlarni tekshirib turishi mumkin.

Hozirda xizmat test sinov rejimida ishlamoqda va faqat O‘zbekiston hududida faoliyat yurituvchi tijorat banklarining kartalari uchun amal qiladi.

Kamron Hasanov