Эрон ва Уммон Ҳўрмуз келишувига эришди
Жаҳон энергетика бозори учун ҳаётий муҳим бўлган Ҳўрмуз бўғозида вазият юмшаши мумкин.
6 август куни Эрон ва Уммон Ҳўрмуз бўғози орқали кемалар қатновини тиклаш тартиби бўйича ўзаро келишувга эришди. Мазкур келишув 60 кун давомида амал қилади. Бу ҳақда «Ал-Арабия» телеканали хабар берди.
Телеканал манбасининг қайд этишича, бўғозни очишга доир бу келишув ҳақида яқин кунларда расман эълон қилиниши мумкин. Бироқ Теҳрон ва Маскат ўртасидаги ушбу ҳужжат ҳали Эрон Олий миллий хавфсизлик кенгаши томонидан тасдиқланиши талаб этилади.
Янги ҳаракат тартиби
«Таклиф этилаётган 60 кунлик келишув кемалар қатновини қайта тиклашга қаратилган. Бу муддат ҳозирги боши берк кўчадан чиқиш ва техник музокараларни бошлашга имкон яратади», — дейилади хабарда.
Янги тартибга кўра, Ҳўрмуз бўғозига кираётган кемалар Эрон қирғоқларига яқин йўлакдан, чиқиб кетаётганлари эса Уммон ҳудудига яқин йўлакдан ҳаракатланади. Бундан ташқари, минтақа давлатлари бўғозни миналардан тозалаш жараёнига ҳам жалб этилиши мумкин.
Музокаралар давом этмоқда
«Al Arabiya» манбасининг қўшимча қилишича, АҚШ ва Эрон ўртасида воситачилар орқали олиб борилаётган музокаралар ҳам давом этмоқда ва улар якуний босқичга кирган. Шунингдек, Эрон ташқи ишлар вазири Аббос Арақчининг шу ҳафта охири ёки келаси ҳафта бошида Покистонга ташриф буюриши кутилмоқда.
Аввалроқ Эрон Ташқи ишлар вазирлиги Теҳрон ва Маскат бўғоз орқали ўтадиган янги йўналиш координаталарини келишиб олгани ҳамда томонлар қўшма баёнот тайёрлаётганини маълум қилган эди.
Шу билан бирга, АҚШнинг беқарорлаштирувчи ҳаракатлари эҳтимоли сабабли мазкур келишув сув йўлагида тўлиқ хавфсизликни кафолатлай олмаслиги ҳам алоҳида қайд этилган.
