Кайфият етишмаяпти — Жаҳон чемпионати олдидан

Таркибдаги йўқотишлар

Ўзбекистон миллий жамоаси турнирга оптимал ҳолатда етиб келди, дея олмаймиз. Йўқотишлар талайгина. Мундиалга чиқишимизга катта ҳисса қўшганлардан бири — иккинчи қаватдаги энг яхши марказий ҳимоячимиз Ҳусниддин Алиқулов хочсимон пайларидан олган жароҳат сабаб мундиални ўтказиб юбориши аввалроқ маълум бўлганди. Фабио Каннаваро жамоаси ўйинларнинг аксарият қисмини ҳимояда ўтказишини инобатга олсак, бу — энг катта йўқотиш.

Алиқуловнинг ўйнамаслигига руҳан тайёр тургандик. Аммо жароҳати бўлса-да, АҚШга олиб кетилган асосий таркиб аъзолари — Ҳожиакбар Алижонов ва Жалолиддин Машариповнинг ўртоқлик баҳсларида 1 дақиқа ҳам ўйнамагани ўзбекистонликларни янада ташвишлантираётгани бор гап. Янада эътиборлиси, ўнг қанот ҳимоясида Алижоновнинг ўринбосари сифатида олиб кетилган Беҳруз Каримов ҳам жароҳат сабаб деярли 2 ойдан бери ўйнамаяпти. Шу боис Канада (0:2) ва Нидерландия (1:2) билан ўртоқлик баҳсларида аслида чап қанот ҳимоячиси саналган Фаррух Сайфиев ўнгда ўйнади ва мағлубиятларда энг кўп танқид қилинганлардан бири бўлди. Бу қанотимиз Луис Диас (Колумбия), Нуну Мендеш ва Рафаэл Леау (Португалия) каби жаҳон даражасидаги футболчиларга қарши туриб бериши кераклигини инобатга олсак, хавотирлар асосли. Умид қиламизки, илк ўйинимизгача Алижонов ва Каримов билан ҳаммаси жойида бўлади.

Жамоа етакчиларидан, чап қанот вингери Жалолиддин Машариповнинг ҳолати эса яхши эмас. У 26 кишилик қайдномадан чиқарилиши мумкинлиги ҳақида гаплар тарқалди. ЎФА матбуот хизматининг ёзишича, футболчининг белидаги жароҳатлар қайта безовта қилган. Машариповнинг ўзи эса инстаграмда "Соғломман" дея пост қолдирди. Ҳужумкор яримҳимоячи таркибда қолдирилса ҳам, унинг майдонга тушиши эҳтимоли паст. Мабодо Жалолиддин қайдномада қолса ҳам, Каннаваро  таъкидлаганидек, кийиниш хонасида кайфиятни ва босимни кўтариш учун хизмат қилиши мумкин.

Кераксиз босим

Ўтказилган икки ўртоқлик ўйинидан сўнг мухлис-у мутахассислар орасида жамоага нисбатан негативлар кўпайиб кетди. 372 кун аввал мундиалга чиқишни орзу қилаётган халқ энди кўпроғини кутиб юбормоқда. Ортиқча шов-шувлар, аввал футболга қизиқмаганларнинг тренддан қолмай деб бирдан "мухлис"га айланиб қолгани ҳам сабаб бўлмоқда.

Қуръа Ўзбекистон учун омадли келгани йўқ. Ўлим гуруҳларидан бирига тушдик. Португалия — Роналдунинг сўнгги мундиалида Жаҳон чемпионлиги учун фаворитлардан бири. Жамоанинг марказий яримҳимоясида Чемпионлар Лигаси ғолиблари Витиния ва Жоау Невеш, АПЛда энг кўп ассистни қайд этиб рекордни янгилаган Бруну Фернандеш ўйнайди. Колумбия — айни вақтда Жанубий Америкада Аргентина ва Бразилиядан кейинги учинчи жамоа, ФИФА рейтингида 13-ўриндан жой олган. Таркибида мавсумни сермаҳсул ўтказган Луис Диас, мундиаллларда топ режимни ёқиб оладиган Хамес Родригес ва Европа лигаларида ўйнайдиган ўнлаб футболчилар бор. Кўпчилик менсимаётган ва гўёки биз ютишимиз шарт бўлган Конго ДР эса саралашда Осимҳен ва Лукмани бор Нигерияни, Мбеумо ва Онанаси бор Камерунни ортда қолдирган. Африкаликларнинг таркиби асосини топ-5 лигада, хусусан, АПЛ ва Лига 1да ўйнайдиган футболчилар ташкил қилади. Қўшимчасига, илк ўйин Мексикада Колумбияга қарши. Мехикодаги стадион Лотин Америкаси жамоаси мухлислари билан тўлиб-тошади. Чунки АҚШга киришга қийналадиган колумбияликлар ўз миллий жамоасини кўриб олиш учун ёппасига Мексикадаги ўйинга келишлари шубҳасиз.

Инсоф билан айтсак, бу гуруҳдаги ҳар бир очко ва ҳар бир голимиз қадрлидир. Шунинг учун ортиқча эйфорияга берилмаслик, плей-оффга чиқиш шарт дея босим қилиш адолатдан эмас. Чунки бу йигитларга ҳам таъсир қиляпти. Уларнинг юриш-туришида, машғулотларда ортиқча жиддийлик ҳукмрон. 35 йил кутилган орзу рўёбини завқ билан амалга оширишга қўйиб бериш керак. Ахир бу — фестивал. Уни байрамдек ўтказиш керак. Биз каби дебютант бўлган Кюрасао машғулотларга рақслар билан, табассум ила кириб келмоқда.

Умуман олганда, танқид қилаётганларни ҳам тушуниш мумкин. Ўйин ўз йўлига, ўртоқлик баҳсларигача жамоанинг мундиал учун чиқарилган либосидан ва таркибдан қониқмаганлар ҳам кўпчиликни ташкил қилди. Уларнинг эътирозига фақат яхши ўйин ёки натижа билан жавоб бериш мумкин. Бу ҳам ЎФА ва жамоага босимни ошириб юбораётгани шубҳасиз. Бундай пайтда жисмоний тайёргарлик билан бирга психология ҳам асосий планга чиқади. Жамоа бунга қанчалик тайёр ёки йўқлигини кўрамиз. Каннаваро айтганидек, йигитлар йўқотадиган нарсаси йўқдек, ортиқча босимсиз ўйнай олса ва иштиёқ билан рақибларга жанг таклиф қилгани кўринса, адекват одамларда эътироз қолмайди. Нолийдиганлар эса доим топилади. Олға, Ўзбекистон!!!

Ўзбекистон миллий жамоасининг ЖЧ-2026 гуруҳ босқичи учун тақвими:

18 июн, 7:00

Ўзбекистон — Колумбия

Мексика, Мехико.

23 июн, 22:00

Португалия — Ўзбекистон

АҚШ, Ҳюстон.

28 июн, 04:30

Конго ДР — Ўзбекистон

АҚШ, Атланта.

Маълумот учун, гуруҳда биринчи ва иккинчи ўринни қўлга киритган жамоалар, шунингдек, энг яхши учинчи поғона эгалари плей-оффга йўлланма олади.