Нархлар ошиши 23 млн кишини қашшоқликка маҳкум қилган — IMF

Халқаро валюта жамғармаси (IMF) тадқиқотига кўра, 2021–2024 йилларда дунё бўйлаб қарийб 23 миллион киши ўта қашшоқликка тушган. Бу кўрсаткич яшаш қиймати инқирозининг аҳоли даромадларига таъсирини қайта баҳолаш заруратини кўрсатмоқда.

IMF таҳлилчиларига кўра, аввалги ҳисоб-китобларда инфляциянинг камбағал аҳолига таъсири тўлиқ инобатга олинмаган. Янги тадқиқотда эса турли мамлакатлардаги нархлар динамикаси ва аҳолининг истеъмол таркиби ҳам ҳисобга олинган.

Энг катта таъсир озиқ-овқат ва энергия нархларидан

Инфляциянинг ўсиши барча аҳоли қатламларига бир хил таъсир қилмаган. Даромади паст оилалар ўз маблағларининг катта қисмини озиқ-овқат, электр энергияси, газ ва бошқа асосий эҳтиёжларга сарфлагани учун нархларнинг ўсишини кучлироқ ҳис қилган.

Шунингдек, энергия нархларининг қимматлаши транспорт ва ишлаб чиқариш харажатларини ошириб, бошқа товар ва хизматлар нархига ҳам босим ўтказган.

Reuters ёзишича, IMF тадқиқоти инфляциянинг қашшоқликка таъсири бир неча йил давомида сақланиб қолиши мумкинлигини кўрсатган. Нархлар кейинчалик барқарорлашган тақдирда ҳам, юқори инфляция даврида даромадлари камайган ёки жамғармаларини сарфлаб қўйган оилаларнинг тикланиши вақт талаб қилади.

Давлатлар учун асосий вазифа

IMF мамлакатларга инфляцияни жиловлаш билан бирга, иқтисодий зарбадан энг кўп зарар кўраётган аҳоли қатламларини мақсадли ижтимоий дастурлар орқали қўллаб-қувватлашни тавсия қилмоқда.

Жамғарма таҳлилига кўра, умумий субсидиялардан кўра эҳтиёжманд аҳолига йўналтирилган ёрдам чоралари иқтисодий жиҳатдан самаралироқ бўлиши мумкин.
Тадқиқот натижалари инфляцияни фақат нархлар ўсиши сифатида эмас, балки аҳоли даромадлари, истеъмол имкониятлари ва қашшоқлик даражасига бевосита таъсир қилувчи омил сифатида баҳолаш зарурлигини кўрсатмоқда.