Нобел лауреатининг «Google»дан кетиши «Alphabet» акциялари пасайишига сабаб бўлди
«Google» компаниясининг сунъий интеллект бўйича икки нафар етакчи тадқиқотчиси «OpenAI» ва «Anthropic» каби рақобатчи компанияларга ўтиб кетди.
«Google» компаниясининг етакчи сунъий интеллект тадқиқотчиларидан бири, кимё бўйича нобел мукофоти лауреати Жон Жампернинг ишдан кетиши ортидан «Alphabet» акциялари кескин тушиб кетди. 22 июн кунги «Nasdaq» биржаси савдолари якунига кўра, бош компания акциялари 5,1 фоизга (энг паст нуқтада 7,2 фоизгача) арзонлаб, 348,78 долларни ташкил қилди. Бу ҳақда «Bloomberg» маълумотларига таяниб «Forbes» хабар берди.
Мазкур ҳолат «Alphabet» учун феврал ойидан бери кузатилган энг кескин пасайиш бўлди. Акциялар нархининг тушишига бевосита «Google DeepMind» вице-президенти Жон Жампернинг рақобатчи «Anthropic» компаниясига ишга ўтишини эълон қилгани сабаб бўлди. Бундан бироз олдин эса «Google»нинг яна бир таниқли тадқиқотчиси Ноам Шазир «OpenAI» компаниясига ўтиб кетган эди.
Маълумот учун, Жон Жампер оқсиллар тузилишини башорат қила олувчи «AlphaFold» сунъий интеллект модели учун Демис Хассабис ва Дэвид Бейкер билан биргаликда 2024 йилда кимё бўйича Нобел мукофотини қўлга киритган.
Кадрлар йўқотиши ва бозордаги рақобат
Собиқ ходимларнинг маълумотларига кўра, Жампер корпоратив мижозлар учун дастурлаш СИ-воситаларини ишлаб чиқиш жамоасининг асосий аъзоси бўлган.
Унинг кетиши «Google» ушбу ечимларни корпоратив мижозларга сотишда қийинчиликларга дуч келаётган бир пайтга тўғри келмоқда. Айни вақтда эса, корпоратив мижозлар учун воситалар яратиш йўналиши «Anthropic» ва «OpenAI» компанияларининг сўнгги ойлардаги асосий ўсиш драйверларидан бирига айланган.
«DA Davidson» технологик тадқиқотлар раҳбари Гил Луриянинг таъкидлашича, бир неча кун ичида икки нафар етакчи тадқиқотчининг умидли лойиҳаларни тарк этиши «Google» сунъий интеллект соҳасидаги кадрлар учун курашда ютқазаётганидан далолат бериши мумкин. Унинг қайд этишича, ўтган йили «Google» ўзининг илғор модели билан СИ пойгасида ғолиблардан бири ҳисобланган бўлса, эндиликда бу етакчиликни йўқотмоқда.
«Vital Knowledge» ахборот бюллетени муаллифи Адам Крисафуллининг қўшимча қилишича, ИИ-моделлари ва дастурлаш воситалари бозорида «OpenAI» ҳамда «Anthropic» доминант мавқени эгалламоқда ва бу борада «Google», xAI ва «Meta» компанияларини сезиларли даражада ортда қолдиришни бошлаган.
