Ўзбекистонда кредитлар қўйилмалари ҳажми 713 трлн сўмдан ошди
Ўзбекистон иқтисодиётига йўналтирилган кредитлар бир йилда 13,6 фоизга ўсди. Ўсишнинг асосий қисми миллий валютадаги қарзлар ҳисобига тўғри келган.
2026-йилнинг 1-сентябр ҳолатига Ўзбекистонда иқтисодиётга кредит қўйилмалари қолдиғи 713,3 трлн сўмни ташкил этди. Бу ўтган йилнинг мос давридаги кўрсаткичдан 85,4 трлн сўм ёки 13,6 фоизга кўп.
Марказий банк маълумотларига кўра, кредит қўйилмаларининг катта қисми миллий валютада шаклланган. Уларнинг қолдиғи 453 трлн сўмга етган ва бир йилда 67,4 трлн сўмга ошган.
Шу тариқа, миллий валютадаги кредитларнинг йиллик ўсиш суръати 17,5 фоизни ташкил этди. Бу умумий кредит портфели ўсишидан юқори бўлиб, банклар томонидан сўмдаги кредитлаш фаоллиги кучайганини кўрсатади.
Валюта кредитлари ҳам кўпайди
Хорижий валютадаги кредит қўйилмалари 260,3 трлн сўмга етди. Бу 2025-йил 1-сентябр ҳолатидаги 242,3 трлн сўмлик кўрсаткичдан 18 трлн сўм ёки 7,4 фоизга юқори.
Ўтган йилнинг шу санасида иқтисодиётга кредит қўйилмалари жами 627,9 трлн сўм бўлган. Шундан 385,6 трлн сўми миллий, 242,3 трлн сўми хорижий валютадаги кредитларга тўғри келган.
Жорий йилда умумий ўсишда сўмдаги кредитлар асосий ҳиссани эгаллаган. Миллий валютадаги кредитлар 67,4 трлн сўмга кўпайган бўлса, хорижий валютадаги кредитлар 18 трлн сўмга ошган.
Кўрсаткич қандай ҳисобланади?
Марказий банк изоҳига кўра, иқтисодиётга кредит қўйилмалари қолдиғи Халқаро валюта жамғармасининг MFSMCG 2016 методологияси асосида ҳисобланади.
Кўрсаткич банк тизимининг реал секторга бўлган қарзлари ва ҳисобланган фоизларини қамраб олади. Шунингдек, қарз қимматли қоғозлари, капитал инструментлари, савдо кредитлари ва бўнаклар каби молиявий талаблар ҳам ҳисобга олинади.
