Ўзбекистонга капсула ўриндиқли 8 та янги тезюрар поезд олиб келинади

«Ўзбекистон темир йўллари» АЖ Берлинда ўтган InnoTrans-2026 кўргазмасида саккизта янги тезюрар электропоезд, локомотивлар ҳамда темир йўл рельслари сотиб олиш бўйича келишувларга эришди. Бу ҳақда компания матбуот хизмати хабар берди.

Қайд этилишича, йўловчиларга қулайлик яратиш мақсадида Жанубий Кореянинг “Hyundai Rotem” компанияси директори Ли Ён Бе билан 8 та янги тезюрар электропоезд сотиб олиш бўйича шартнома концепцияси муҳокама қилинган. Унга кўра, поездларнинг сўнгги икки вагонини ўзгартириш ва бизнес-класс ўрнига замонавий капсула ўриндиқлари билан жиҳозланган столли VIP-вагонларни (ҳар бир поездда биттадан) ўрнатиш бўйича ўзаро келишувга эришилган.

Таъкидланишича, кўргазма доирасида Хитойнинг CRRC корпорацияси билан учрашувда қатор иқтисодий лойиҳаларга қўл урилган. Хусусан, Ўзбекистондаги саноат корхоналари базасида локомотивларни таъмирлаш ва уларга хизмат кўрсатиш бўйича замонавий сервис марказини ташкил этиш режалаштирилмоқда. Шунингдек, хитойлик ҳамкорлар билан биргаликда ғилдирак изи кенглигини ўзгартириш имкониятига эга бўлган замонавий юк вагонларини ишлаб чиқариш лойиҳаси бошланиши кўриб чиқилган.

Тақдимотда айтилишича, Европа комиссиясининг халқаро ҳамкорлик бўйича вакиллари Ўзбекистон темир йўл тармоғини ривожлантиришда ҳар томонлама ёрдам кўрсатишга тайёрлигини билдирган. Бундан ташқари:

• Германиянинг “Deutsche Bahn” компанияси билан ўзбекистонлик мутахассисларни малака оширишга юбориш ва илмий ишланмалар қилиш бўйича келишилган;
• Сербия темир йўллари маъмурияти билан Сербия магистралларини модернизация қилиш лойиҳаларида ўзбекистонликлар иштирок этиши масаласи кўтарилган;
• Хитойнинг “Huawei” компанияси ва бошқа технологик корпорациялар билан темир йўл соҳасини рақамлаштириш бўйича қатор учрашувлар ўтказилган.