Пластик ва виртуал карталар: қайси банкларда уларни бепул олиш мумкин?

Ўзбекистонда 30 дан ортиқ банк аҳолига пластик ва виртуал банк карталарини бепул расмийлаштириш имкониятини таклиф қилмоқда. Бироқ барча карталар учун шартлар бир хил эмас: айримларини фақат мобил илова орқали буюртма қилиш, бошқаларини эса иш ҳақи ёки ижтимоий тўловлар учун очиш мумкин.

Бироқ картанинг бепул чиқарилиши ундан фойдаланиш ҳам бепул дегани эмас. Айрим банкларда карта очиш учун ҳақ олинмаса-да, унга ойлик ёки йиллик хизмат ҳақи белгиланган. Баъзи карталарни бепул олиш учун эса ҳисобда муайян миқдорда маблағ сақлаш ёки уларни фақат мобил илова орқали буюртма қилиш талаб этилади.

Материалда айнан қайси банклардан пластик ва виртуал карталарни бепул расмийлаштириш мумкинлиги ҳамда бунинг учун қандай шартлар белгиланганини кўриб чиқамиз.

Қайси банкларда картани бепул олиш мумкин?

Ўзбекистонда фаолият юритаётган банкларнинг аксарияти мижозларга миллий ва халқаро тўлов тизимларига тегишли карталарни бепул чиқаришни таклиф қилмоқда. Улар орасида UZCARD ва HUMO билан бирга Visa, Mastercard ҳамда UnionPay карталари ҳам бор. Айрим банкларда пластик ва виртуал карталарни бир вақтда бепул олиш мумкин.

Бепул карта олиш учун қандай шартлар бор?

Банкларда картани бепул расмийлаштириш имконияти мавжуд бўлса-да, айрим таклифлар муайян шартлар билан чекланган. Баъзи карталар фақат иш ҳақи, пенсия ёки ижтимоий тўловлар учун очилади. Бошқаларини эса мобил илова орқали буюртма қилиш ёки ҳисобда белгиланган миқдорда маблағ сақлаш талаб этилади.

Иш ҳақи ва ижтимоий тўловлар учун очиладиган карталар

«O‘zmilliybank», SQB, «Xalq banki», «Biznesni rivojlantirish banki», «Mikrokreditbank», «Turonbank», «Trastbank», «Ziraat Bank Uzbekistan» ва «Poytaxt bank»да айрим UZCARD ҳамда HUMO карталари иш ҳақи, пенсия, стипендия ёки ижтимоий тўловлар учун бепул расмийлаштирилади.

«Biznesni rivojlantirish banki»да UZCARD, HUMO, UZCARD–UnionPay карталари иш ҳақи ва ижтимоий тўловлар учун бепул берилади. Трастбанкда эса айрим кобейж карталар ҳам тегишли тўлов лойиҳалари доирасида бепул берилади.

Бу ҳолатда картани оддий тартибда очиш билан иш ҳақи ёки ижтимоий тўлов лойиҳаси орқали олиш шартларини фарқлаш керак. Бепул расмийлаштириш имконияти айнан тегишли лойиҳа доирасида амал қилади.

Илова орқали буюртма қилиш талаб этиладиган карталар

Айрим банкларда картани бепул олиш учун буюртмани мобил илова ёки онлайн канал орқали бериш керак. Масалан, «Hamkorbank»да HUMO картаси илова орқали буюртма қилинганда бепул чиқарилади.

«Ipak Yo‘li bank»да UZCARD Duo ва HUMO, «Orient Finans Bank»да эса UZCARD, HUMO, Visa Classic, Mastercard Standard ва Visa Platinum карталарига илова орқали буюртма бериш мумкин.

«Tayanch mikromoliya banki»да UZCARD картасини «Tayanch» мобил иловаси орқали буюртма қилиш мумкин. Уни филиалдан олиб кетиш ҳам бепул. «TBC Bank» эса биринчи пластик картани чиқариш ва мижозга етказиб бериш учун ҳақ олмайди.

Айрим таклифлар маълум муддатгача амал қилади

Баъзи банкларнинг бепул карта чиқариш таклифлари маълум муддатга мўлжалланган. Жумладан, «Ipoteka-bank»да Moment картасини 2026-йил 30-ноябргача, «Asia Alliance Bank»да UZCARD Moment картасини эса 31-декабргача бепул расмийлаштириш мумкин.

«Anorbank»да Mastercard Virtual картасини 31-декабргача мобил илова орқали бепул очиш таклифи мавжуд. Бу муддатлар тугагач, картани чиқариш шартлари ўзгариши мумкин.

Минимал маблағ ва депозит талаблари

Айрим карталарда чиқариш ҳақи олинмаса-да, ҳисобда муайян миқдорда маблағ сақлаш талаб этилади. Масалан, «InFinBank»нинг Visa Classic Zero ва Visa Platinum Zero карталарида белгиланган минимал қолдиқ сақланмаса, ойлик хизмат ҳақи ундирилади.

«Octobank»нинг Visa Classic картасида ҳам минимал қолдиқ шарти бор. «Asia Alliance Bank»нинг айрим халқаро Junior карталарини расмийлаштириш учун эса минимал депозит талаб қилинади.

Махсус шартлар асосида бериладиган карталар

«Kapitalbank» таклиф қилаётган айрим премиум карталар, жумладан Visa Infinite ва Mastercard World Elite туркумидаги карталар махсус дастур ёки мижоз мақомига боғлиқ. Шу сабабли уларни барча мижозлар бир хил шартларда бепул расмийлаштира олмайди.

Шуни ҳам унутмаслик керакки, картани чиқариш бепул бўлиши ундан фойдаланиш ҳам бепул дегани эмас. Банклар ойлик ёки йиллик хизмат кўрсатиш, пул ўтказмалари ва нақд пул ечиш учун алоҳида ҳақ белгилаши мумкин. Шу боис картани танлашдан олдин унинг амалдаги тарифлари ва шартларини текшириш лозим.

Эслатиб ўтамиз, аввалроқ Марказий банк банкларга бир банк томонидан чиқарилган карталар ўртасидаги тўловларни ўз инфратузилмасида, учинчи томон иштирокисиз қайта ишлаш имконини берувчи тартибни тасдиқлаганди. Янги тартиб 2026-йил 27-ноябрдан кучга киради.