Rossiyadan ketgan fuqarolarning mol-mulki xatlanishi mumkin
Rossiya prezidenti Vladimir Putin imzolagan yangi qonunga ko‘ra, chet elda yashayotgan rossiyaliklarning mol-mulki ayrim ma’muriy ishlar bo‘yicha sud qarori chiqmasidan oldin ham xatlanishi mumkin.
Rossiya prezidenti Vladimir Putin mamlakatni tark etgan fuqarolarning mol-mulkini muayyan ma’muriy huquqbuzarliklar bo‘yicha ish yuritilayotgan vaqtda xatlash imkonini beruvchi qonunni imzoladi. Yangi tartib 2026 yil 1-sentabrdan kuchga kiradi.
Hujjatga muvofiq, Rossiya manfaatlariga qarshi deb baholanishi mumkin bo‘lgan ayrim huquqbuzarliklar bo‘yicha chet elda yashayotgan fuqarolarning mol-mulkiga nisbatan xatlov qo‘llanishi mumkin.
Qonun Ma’muriy javobgarlik to‘g‘risidagi kodeksning o‘ndan ortiq moddasini qamrab oladi. Ular qatoriga «xorijiy agent» faoliyati qoidalarini buzish, ekstremistik materiallarni tarqatish, ommaviy axborot vositalari orqali yolg‘on ma’lumot tarqatish, «noxush tashkilotlar» faoliyatida ishtirok etish hamda Rossiya armiyasini «obro‘sizlantirish» kabi holatlar kiritilgan.
Jarimani ta’minlash chorasi
Yangi tartibga ko‘ra, mol-mulkni xatlash ma’muriy jarimaning ijrosini ta’minlash vositasi sifatida qo‘llanadi. Bunda xatlanayotgan aktivlar qiymati belgilanishi mumkin bo‘lgan jarima miqdori bilan cheklanmaydi.
Shuningdek, xatlov chorasi yakuniy sud qarori qabul qilinmasidan avval ham joriy etilishi mumkin. Sudya tegishli iltimosnomani ro‘yxatga olinganidan keyingi kundan kechiktirmay ko‘rib chiqishi lozim.
Egasi ogohlantirilmaydi
Qonunga muvofiq, mol-mulk egasini xatlov haqida oldindan xabardor qilish talab etilmaydi. Bu esa qaror qabul qilinishi jarayonida mulkdorning ishtirokisiz cheklovlar joriy etilishi mumkinligini anglatadi.
Mol-mulkka xatlov qo‘yilishi uni tasarruf etish huquqini cheklaydi. Natijada mulk egasi aktivni sotish, hadya qilish yoki boshqa shaxs nomiga rasmiylashtirish imkoniyatidan mahrum bo‘ladi. Qonun rasman 2026 yil 1-sentabrdan amal qila boshlaydi.
