Таиланд мамлакатдан чиқиб кетувчи сайёҳлар учун солиқ жорий этишни кўриб чиқмоқда

Таиланд ҳукумати мамлакатдан ҳаво орқали чиқиб кетувчи барча йўловчилар, жумладан хорижликлар учун янги солиқ жорий этишни режалаштирмоқда. Ҳозирча бу фақат қонун лойиҳаси бўлиб, жамоатчилик муҳокамаси давом этмоқда.

Таиланд Молия вазирлиги ҳузуридаги Даромадлар департаменти «Чиқиш солиғи тўғрисида»ги қонун лойиҳасини жамоатчилик муҳокамасига чиқарди. Таклифга кўра, мамлакатдан самолётда чиқиб кетаётган ҳар бир йўловчидан 1 000 тайланд бати (тахминан $29,75) ундирилиши мумкин.

Янги солиқ йўловчининг фуқаролигидан қатъи назар қўлланади. Бироқ қонун лойиҳасида айрим тоифадаги шахслар учун имтиёзлар назарда тутилган.

Солиқ миқдори 5 000 батгача оширилиши мумкин

Қонун лойиҳасига кўра, дастлаб ҳаво транспорти орқали мамлакатдан чиқиш учун 1 000 бат миқдорида солиқ белгиланади. Шу билан бирга, келгусида солиқ ставкасини вазирлик қарори билан ўзгартириш мумкин бўлади. Унинг юқори чегараси 5 000 бат (тахминан $148,75) этиб белгиланиши режалаштирилмоқда.

Дастлабки босқичда қуруқлик ва денгиз орқали мамлакатдан чиқиб кетувчилардан ушбу солиқ ундирилмайди.

Таклиф 1983 йилда қабул қилинган, аммо ҳозир амалда ундирилмаётган чиқиш солиғи тизимини янгилашни назарда тутади.

Солиқни авиакомпаниялар ундириши мумкин

Таклиф қабул қилинса, йўловчилар солиқни Таиланддан чиқиб кетишидан олдин тўлаши керак бўлади. Одатда маблағ авиачипта нархи билан бир вақтда авиакомпания ёки билет сотувчи агент томонидан ундирилади.

Янги тартиб авиакомпаниялар, билет агентликлари, аэропорт операторлари ва халқаро қатновлар билан боғлиқ айрим давлат ташкилотларига ҳам қўшимча мажбуриятлар юклайди.

Кимлар солиқдан озод қилиниши мумкин?

Қонун лойиҳасида бир қатор истиснолар бор. Жумладан, 2 ёшга тўлмаган болалар, хорижий давлат раҳбарлари, расмий давлат меҳмонлари, айрим халқаро ташкилотлар инспекция гуруҳлари ва хизмат вазифасини бажараётган экипаж аъзолари солиқдан озод қилиниши мумкин.

Транзит йўловчиларнинг ҳам белгиланган транзит ҳудудидан чиқмайдиган қисми учун солиқ қўлланилмайди.

Ҳозирча солиқ жорий этилгани йўқ

Таиланд Даромадлар департаменти қонун лойиҳаси бўйича жамоатчилик фикрини 29 октябрга қадар қабул қилмоқда. Агар ҳужжат қабул қилинса, қонун Таиланд Ҳукумат газетасида эълон қилинганидан 180 кун ўтиб кучга кириши белгиланмоқда.

Шунингдек, қонун кучга киришидан олдин сотиб олинган авиачипталар бўйича йўловчиларга янги солиқ татбиқ этилмаслиги режалаштирилган.