Хоразмда жамоат транспорти тўловлари тўлиқ электрон шаклга ўтказилади

Хоразм вилоятида жамоат транспортида йўлкира ҳақини тўлаш тизимини босқичма-босқич тўлиқ электрон шаклга ўтказиш бўйича янги тартиб жорий этилади. Бу ҳақда вилоят ҳокимининг тегишли қарорида белгилаб берилди.

Қарорга кўра, янги тизим икки босқичда амалга оширилади.

Биринчи босқичда 2026 йил 1 июлдан SHI-4, SHI-5, SHI-7, SHI-13, SHI-18, SHI-19 ва SHI-28-сонли автобус йўналишлари ҳамда Т1-сонли «Урганч — Хива» троллейбус йўналишида йўлкира ҳақи учун тўловлар фақат электрон шаклда қабул қилинади.

Иккинчи босқичда эса қолган автобус ва троллейбус йўналишларида брутто-шартномалар расмийлаштирилгач, нақд пулсиз тўлов тизими босқичма-босқич жорий этилади. Шундан сўнг ушбу йўналишларда ҳам йўлкира ҳақи фақат электрон тарзда қабул қилинади.

Қарор билан троллейбусларда бир йўловчи учун йўлкира ҳақи 3 минг сўм этиб белгиланди. Шунингдек, оғирлиги 20 килограммдан ортиқ багажни ташиш учун 4 минг сўм миқдорида бир марталик тўлов ундирилади.

Бундан ташқари, электрон тўлов тизимининг узлуксиз ишлашини таъминлаш мақсадида D215 «Урганч — Хива» автомобил йўли бўйлаб жойлашган бекатлар инфратузилмасини такомиллаштириш ҳам режалаштирилган. Хусусан, чипталарни харид қилиш учун инфокиосклар ўрнатилади, шунингдек, зарур техник воситалар ва электр таъминоти қувватлари билан таъминлаш чоралари кўрилади.

Эслатиб ўтамиз, Хоразм вилояти ҳокимининг 2025 йил 11 июндаги қарори билан Урганч ва Хива шаҳарларида жамоат транспортида электрон тўловлар учун алоҳида тарифлар жорий этилган бу ҳақда Хоразм жамоат транспорти хабар берган эди. Унга кўра, нақд пул орқали тўлов 3 минг сўм, банк карталари ва АТТО транспорт картаси орқали тўлов эса 2 300 сўм этиб белгиланган.

Шунингдек, АТТО транспорт картасидан фойдаланган йўловчилар бир соат ичида иккинчи маротаба автобусдан фойдаланганда йўлкира ҳақини тўламайди. Мазкур тартиб ҳозирда фақат Урганч шаҳар йўналишларида фаолият юритаётган автобусларда амал қилади.