Ёмғир солиғи: Европа аҳолиси нега уни тўлайди?

Сўнгги йилларда «ёмғир солиғи» деган атама тобора кўпроқ қулоққа чалиниб қолмоқда. Кўпчилик учун бу ғалати эшитилиши мумкин, аммо бундай йиғим ҳақиқатдан ҳам айрим давлатларда амал қилади. Бу ҳақда «Zielony ogrodek» хабар берди.

Ёмғир солиғи нима дегани?

Аслида гап ёмғирнинг ўзи учун тўлов ҳақида эмас.

Бу — ёмғир сувини шаҳар канализация тизимига чиқариш учун жорий этилган махсус йиғим. Ёғингарчилик суви асфалт, том ва бошқа қаттиқ юзаларга тушганда ерга сингмайди, балки ёмғир суви канализациясига оқиб тушади. Бу тизимни сақлаш ва хизмат кўрсатиш катта харажат талаб қилгани учун айрим давлатлар алоҳида тўлов жорий қилган.

Кўпинча бундай солиқ миқдори қуйидагиларга боғлиқ бўлади:

том майдони;
ҳовлидаги бетон ёки асфалт ҳажми;
ёмғир суви оқимининг миқдори.

Қайси давлатларда тўланади?

Бундай йиғим аллақачон қатор Европа давлатлари ва АҚШда амал қилади.

Энг машҳур мисол — Германия. У ерда кўчмас мулк эгалари ёмғир сувини чиқариш хизмати учун ҳақ тўлайди. Тўлов миқдори сувни ўтказмайдиган юзалар майдонига қараб ҳисобланади.

Тўлов миқдори қанча?

Тўлов ҳар квадрат метр учун 69 евроцентдан 1,89 еврогача бўлиши мумкин. Йилига немислар ўртача 149–199 евро тўлашади.

Шунга ўхшаш тизимлар Нидерландия, Дания, АҚШ ҳамда Францияа ва Белгиянинг айрим шаҳарларида ҳам мавжуд.

Кўплаб мамлакатларда ушбу маблағлар ёмғир суви канализациясини сақлаш, шаҳарларни сув босишидан ҳимоя қилиш ёки сув чиқариш тизимини модернизация қилишга йўналтирилади.

Нега бундай солиқ жорий қилинмоқда?

Асосий сабаб — иқлим ўзгариши ва шаҳар инфратузилмасига тушаётган юкламаларнинг ортиши.

Кучли ёмғирлар вақтида канализация тизими кўпинча сув оқимини қабул қила олмайди. Бу эса кўчаларни сув босиши ва йўлларга зарар етказишига олиб келади.

Бундан ташқари, бундай солиқ уй эгаларини:

дренаж тизимлари ўрнатишга;
ёмғир сувини йиғиш тизимларидан фойдаланишга;
бетон ва асфалт ўрнига кўпроқ яшил ҳудудлар яратишга рағбатлантиради.